Ձեր վստահելի աղբյուրը

Հայաստանի և Թուրքիայի միջև դիվանագիտական հարաբերությունների հաստատման մասին արձանագրությունների ներքին քննարկման համար սահմանված ժամկետի սպառմանն ընդառաջ Ադրբեջանում խուճապային տրամադրություններն ահագնանում են: Բաքվում այլևս չեն կարողանում զսպել զգացմունքները. վերլուծական շրջանակներում խոսում են Էրդողանի նկատմամբ հիասթափության, իրենց խաբելու մասին, իսկ պաշտոնական տարբեր օղակներ իրարամերժ հայտարարություններ են անում:

Այսօր Բաքվում լրագրողների հետ հանդիպումներ են ունեցել ալիևյան կլանի կարկառուն երկու ներկայացուցիչներ և երկուսն էլ անդրադարձել են հայ-թուրքական հարաբերությունների կարգավորման գործընթացին:

«Թրենդ» գործակալության հաղորդմամբ` նախագահի աշխատակազմի հասարակական-քաղաքական բաժնի ղեկավար Ալի Հասանովը հայտարարել է, թե Ադրբեջանի կառավարության դիրքորոշումն այն է, որ Թուրքիան չպետք է Հայաստանի հետ որևէ փաստաթուղթ ստորագրի: «Հայաստանի ու Թուրքիայի միջև ցանկացած փաստաթղթի ստորագրում` առանց Լեռնային Ղարաբաղի հակամարտության լուծման, հակասում է Ադրբեջանի շահերին»,- ընդգծել է Ալի Հասանովը:

Իսկ ահա երկրի փոխարտգործնախարար Արազ Ազիմովը նույն օրը տված ասուլիսում, ըստ «Թուրան» գործակալության, նախ հրաժարվել է անդրադառնալ այդ հարցին, ապա նկատել է, թե Թուրքիան իր սեփական շահերն ունի և ցանկանում է Հայաստանի հետ սկզբունքային խնդիրներ լուծել: «Կոնցեպտուալ որոշումների ընդունումը կարող է բերել դրական արդյունքների»,- հայտարարել է Արազ Ազիմովը` ընդգծելով նաև, որ հայ-թուրքական արձանագրությունների ստորագրումը ղարաբաղյան հակամարտության վրա ազդեցություն ունենալ չի կարող:

Եթե պաշտոնյաները տակավին փորձում են ինչ-որ կերպ համադրել առկա վիճակն ու նախորդիվ տրված սին խոստումներն ու հավաստիացումները, ապա վերլուծական շրջանակներում այլևս խախտվում են «լռության երդումները»: Նման առաջին դրսևորումն է այսօր «Բաքիլիլար.ազ» կայքում զետեղված «Էրդողանի երկակի խաղը կամ նրա ո՞ր խոսքին հավատանք» հոդվածը, որտեղ ադրբեջանցի վերլուծաբան Էլհան Աղամիրզաևը փորձել է իրերն իրենց անուններով կոչել և հիմնավոր կերպով ցույց է տվել, որ Ռեջեփ Թայիբ Էրդողանի` նախկինում տրված հավաստիացումները որևէ արժեք չունեն, քանի որ Թուրքիան այսօր ձեռնարկում է դրանց հակասող քայլեր:

Հոդվածագիրը եզրակացնում է, որ, իրականում, Ադրբեջանի շահերի մասին որևէ խոսք անգամ չկա: «Այսինքն` խոսքեր կան, գործ չկա»,- սրտնեղում է Աղամիրզաևը` նշելով, որ բանավոր կերպով տրված հավաստիացումները որևէ առարկայական ապացույց չեն ստացել:
Ադրբեջանցի վերլուծաբաննն անհրաժեշտ քննադատություն է ուղղում նաև սեփական երկրի պաշտոնյաների հասցեին` նրանց մեղադրելով Թուրքիայի ջրաղացին ջուր լցնելու և իրենց մոլորեցնելու մեջ: «Նկատե՞լ եք, թե ինչ հանգստությամբ ադրբեջանական «երաշխիքներ կան, որ…», «հարյուր տոկոսով…», «երբեք, մինչև…», «մենք վստահ ենք…» ձևակերպումները վերափոխվել են ու դարձել «հաշվի կառնի…», «հուսով ենք…» և այլնի»,- գրում է ադրբեջանցի հեղինակն ու նշում, թե այլևս կասկած չունի, որ երկու գործընթացները զուգահեռ են ու չեն հատվում:

Ամփոփելով իր բացահայտող հոդվածը` Ադրբեջանից վերլուծաբանը գտնում է, որ Էրդողանը խաբել է ոչ միայն ադրբեջանցիներին, այլև Թուրքիայի խորհրդարանի պատգամավորներին, ուստի առաջարկել է, որպեսզի անհրաժեշտ բացատրական աշխատանքներ տարվեն թուրք մեջլիսականների հետ:

Այս խուճապային դրսևորումների վրա էլ ավելի տարօրինակ է Ադրբեջանի արտաքին գործերի նախարարության գործունեությունը: Այս գերատեսչությունը նախ չեղյալ է համարում NTV հեռուստաընկերության` Ադրբեջանի թղթակցի հավատարմագիրը` դա պատճառաբանելով այն հանգամանքով, որ այդ հեռուստաընկերության ներկայացուցիչները այցելել են Ստեփանակերտ և նկարահանում են իրականացրել ԼՂՀ տարածքում: Այնուհետև այն բանից հետո, երբ հեռուստաընկերությունը պաշտոնապես հայտնում է, որ իրենք իրենց գործն են կատարել և դրանով նպատակ չեն ունեցել վիրավորել «եղբայրական Ադրբեջանին», էլ ավելի է կատաղում ու սպառնում, որ «քանի դեռ մեղավորները չեն պատժվել, հավատարմագրերը չեն վերականգնվելու»:

Այս պատմությանն ուշադրություն չէինք դարձնի, եթե չլիներ մեկ բայց: Ադրբեջանի արտգործնախարարության ներկայացուցիչ Էլհան Փոլուխովը պաշտոնական հայտարարության մեջ նաև գրել է. «Ոչ միայն այդ հեռուստաընկերության, այլև տարբեր միջազգային լրատվամիջոցների մյուս ներկայացուցիչները ևս, ովքեր Ադրբեջանի օրենքները խախտող` հատկապես այնպիսի զգայուն հարցերում, ինչպիսին ապօրինի կերպով Լեռնային Ղարաբաղ այցելելն է, քայլեր են ձեռնարկում, պետք է իմանան, որ դրանից հետո հետևելու է ադրբեջանական կողմի կոշտ ու անզիջում արձագանքը» (մեջբերումն` ըստ «Դեյ.ազ»-ի):

Չենք գտնում, որ այս արտահայտությունը Էլհան Փոլուխովն արել է խուճապի մեջ գտնվելու, կամ ծայրաստիճան բորբոքված լինելու պատճառով, ուստի այն համարում ենք պաշտոնական տեսակետ: Ըստ այդմ ակնկալում ենք, որ պաշտոնական Բաքուն NTV-ի օրինակով մոտ օրերս հավատարմագրերից կզրկի նաև ռուսական գրեթե բոլոր, բրիտանական «BBC», գերմանական «Deutsche Welle» հեռուստաընկերություններին (ցանկը ամբողջական չէ, անհրաժեշտության դեպքում կարող ենք լրացնել): Եվ եթե Ադրբեջանի ԱԳՆ-ն նման որոշում չկայացնի, կարող ենք եզրակացնել, որ NTV-ի դեպքն ընդամենը «ուխտադրուժ» թուրքերին պատժելու քայլ էր, որը այլ շարունակություն է ունենալու: