Ձեր վստահելի աղբյուրը

Չնայած Ադրբեջանի ԱԳՆ իրականացրած ուժեղ հակադարձմանը ԼՂՀ Օմբուդսմանի հաստատությանը օգոստոսի 31-ին շնորհվել է Եվրոպական օմբուդսմանների ինստիտուտի լիարժեք անդամի կարգավիճակ: Ինստիտուտի գործադիր մարմնի բոլոր 11 անդամները միաձայն կողմ են արտահայտվել: Բայց մինչ այդ Ինտիտուտի տնօրենի ղեկավարությամբ պատվիրակություն է պաշտոնական այցով եղել Ստեփանակերտում, նրանք ծանոթացել, տեսել ու գնահատել են ԼՂՀ-ում Օմբուդսմանի հաստատության գործունեությունը, մարդու իրավունքների պաշտպանության մակարդակը: Անդամակցության վերաբերյալ պաշտոնական գրություն հայկական կողմը ստացել է օրերս:

Այսօր Երևանում լրագրողներին այդ ուրախ լուրը հայտնեցին ու շոնրավորեցին ՀՀ մարդու իրավունքների պաշտպան Արմեն Հարությունյանը և ԼՂՀ մարդու իրավունքների պաշտպան Յուրի Հայրապետյանը: Նրանք վաղը Երևանից միասին կմեկնեն Իտալիա՝ մասնակցելու ինստիտուտի տարեկան համագումարին:

«Ինստիտուցիանոլ առումով մենք արդեն միջազգային միևնույն հարթակում ենք, որտեղ Ղարաբաղի մի ինստիտուտը իր կոլեգաների հետ՝ Գերմանիայի, Ֆրանսիայի, Անգլիայի և իհարկե Ադրբեջանի հետ հավասար, նույն կարգավիճակով մասնակցում է դրան»,-ասաց Արմեն Հարությունյանը:

ԼՂՀ Օմբուդսմանի ինստիտուտը ձևավորվեց նախորդ տարի, 2008-ի ապրիլի 16-ին ԼՂՀ ԱԺ-ն ԼՂՀ առաջին օմբուդսման է ընտրել Յուրի Հայրապետյանին: «Այս ինստիտուտը մենք ստեղծել ենք մեզ պարտադրած ռազմական դրության պայմաններում: Այն պայմաններում, երբ գրեթե բոլոր պետությունների օրենքները իրավունք են տալիս վարվել ճիշտ հակառակը, այսինքն թույլ է տալիս սահմանափակել որոշ իրավունքներ և ազատություններ»,-ասաց Յուրի Հայրապետյանը, նշելով, որ այս կարճ ժամանակում կառույցին հաջողվել է քաղաքացիների մոտ ձեռք բերել հարգանք ու վստահություն, միաժամանակ իշխանության բոլոր թևերի հետ փոխհարաբերություններում ձևավորել բարյացակամ և փոխըմբռնման մթնոլորտ:

Նախորդ տարի ԼՂՀ-ում Օմբուդսմանի գրասենյակի ստեղծումից անմիջապես հետո Ադրբեջանի ՄԻՊ Էլմիրա Սուլեյմանովան հանդես էր եկել հայտարարությամբ, թե դա «խայտառակ շոու է, միջազգային հանրությունը չի ճանաչի Ղարաբաղի անկախությունը, չճանաչված են համարվում նաև այստեղ ստեղծված ցանկացած պետական հաստատություններ»:

Panorama.am-ի թղթակիցն այսօր հայկական երկու պետությունների օմբուդսմաններին հիշեցրեց այս հայտարարությունն ու մեկնաբանություն խնդրեց:

«Ես հույս ունեմ, որ այնուամենայնիվ այդ երկրի այս ինստիտուտի ներկայացուցիչը կամաց-կամաց կսկսի որդեգրել իր գործունեության մեջ այն արժեհամակրգը, որը ուղեցույց է եղել Եվրոպական օմբուդսմանների ինստիտուտի համար, որի անդամն է նաև նա: Այս ինստիտուտին ԼՂՀ օմբուդսմանի հաստատության անդամագրվելու փաստը ապացույց է այն համոզման, որ մարդու իրավունքների պաշտպանությունը համամարդկային արժեք է և վեր է կանգնած ցանկացած քաղաքական, կամ ինչպես տվյալ դեպքում, նեղ անձնային շահերից: Ստեղծված պայմաններում մեզ հավանաբար մնում է սպասել տիկին Սուլեյմանովայի պաշտոնական շնորհավորական ուղերձին»,-ասաց ՀՀ ՄԻՊը:

Յուրի Հայրապետյանն իր հերթին հիշեցրեց, որ հենց այդ ասուլիսում ադրբեջանցի լրագրողները այդ հայատրարությունից հետ Սուլեյմանովային խորհուրդ են տվել օրինակ վերցնել և սովորել Հայաստանի և Վրաստանի օմբուդսմաններից:

«Ես մեկ-մեկ կիսակատակ ասում եմ, որ այս ինստիտուտին անդամակցության հարցում ամենամեծ օգնությունը ցուցաբերել է Ադրբեջանը, ով դիմել է տարբեր ինստիտուտներին չճանաչելու և չընդունելու այդ ինստիտուտի լեգիտիմությունը»,-պատասխանեց ԼՂՀ օմբուդսմանը: