Ձեր վստահելի աղբյուրը

Ուսուցչի տոնի առթիվ այսօր Ա. Բաբաջանյանի անվան ֆիլհարմոնիայի դահլիճում կազմակերպվել էր տոնկան մեծ միջոցառում: Հանդիսությանը ներկա էին ՀՀ վարչապետ Տիգրան Սարգսյանը, ՀՀ ԿԳ նախարար Արմեն Աշոտյանը, Աժ պատգամավորներ, մարզպետներ, հասարակական կազմակերպությունների ներկայացուցիչներ, մանկավարժներ: Տոնական միջոցառման ժամանակ ափոփվեցին նաև «Տարվա լավագույն ուսուցիչ», «Տարվա լավագույն տնօրեն» և «Տարվա լավագույն դաստիարակ» մրցույթների արդյունքները:

«Տարվա լավագույն ուսուցիչ» մրցույթի հաղթող ճանաչվեց Սևանի թիվ 7 միջնակարգ դպրոցի կենսաբանության ուսուցչուհի Ռուզաննա Հակոբյանը, իսկ «Տարվա լավագույն դաստիարակ» մրցույթի հաղթող` Կապանի թիվ 6 մանկապարտեզի դաստիարակ Անահիտ Այվազյանը, որոնց ՀՀ վարչապետ Տիգրան Սարգսյանը հանձնեց ՎԱԶ 2606 մակնիշի ավտոմեքենաների բանալիներ: Իսկ «Տարվա լավագույն տնօրեն» մրցույթի հաղթող ճանաչված Գյումրիի թիվ 2 դպորցի տնօրեն Հովհաննես Պետրոսյանին ԿԳ նախարար Ա. Աշոտյանը հանձնեց համակարգիչ:

ՀՀ վարչապետ Տիգրան Սարգսյանը, շնորհավորելով բոլոր ուսուցիչներին տոնի առթիվ, նշեց, որ այս տոնը ևս մեկ անգամ առիթ է կարևորելու ուսուցչի առաքելությունը մեր կյանքում: «Վերջին տարիների ընթացքում պետությունը լուրջ ջանքեր է գործադրում, որպեսզի ուսուցիչները Հայաստանում ըստ արժանվույն գնահատվեն: 2002 թվականից մինչ այսօր ուսուցիչների աշխատավարձը բարձրացել է 4,5 անգամ: Պետության մոտեցումը վկայում է այն մասին, որ ուսուցիչները գտնվում են մեր ուշադրության կենտրոնում»,- հավելեց նա:

Վարչապետի խոսքերով, ուսուցիչների աշխատանքով է պայմանավորված մեր երկրի ապագան` մանավանդ 21-րդ դարում, երբ գիտելիքը, ոչ միայն տնտեսության, այլև հասարակության հենքն է: Նա նշեց, որ ՀՀ կառավարության ուշադրության կենտրոնում է դպրոցաշինությունը, մասնավորապես` վթարային դպրոցների վերականգնումը: Այսօր հանրապետությունում կա 24 վթարային դպրոց, սակայն նախորդ տարի այդ թիվը երկու անգամ ավելին էր: ՀՀ վարչապետն այսօր մի շարք վաստակաշատ ուսուցիչների հանձնեց հուշամեդալներ և պատվոգրեր:

«Ես ցանկանում եմ, որ յուրքանչյուր տարի յուրաքանչյուր ուսուցիչ կյանք բաց թողնի իրենից ավելի հմուտ աշակերտի, այդ դեպքում մեր պետությունը կծաղկի»,- շնորհավորելով տոնի առթիվ` ասաց ՀՀ Կրթության և գիտության նախարար Արմեն Աշոտյանը: ԿԳ նախարարը կրթական և գիտական համակարգում մեծ ավանդ ներդրած մի շարք ուսուցիչների պարգևատրեց ԿԳ նախարարության «Ոսկե հուշամեդալով»:

Նշենք, որ Հանրապետությունում յուրաքանչյուր տարվա հոկտեմբերի առաջին կիրակին նշվում է որպես «Ուսուցչի օր»: