Ձեր վստահելի աղբյուրը

Երեկ Լեռնային Ղարաբաղի հակամարտության կարգավորման առնչությամբ հերթական անգամ հայտարարություն է արել Միջազգային ճգնաժամային խումբը (ՄՃԽ):

«Տարեվերջին Հայաստանն ու Ադրբեջանը Լեռնային Ղարաբաղի հակամարտության առնչությամբ եղած փակուղային վիճակը հանգուցալուծող հիմնարար սկզբունքների փաստաթղթին պետք է հավանություն տան, այլապես` նրանք չեն կարող խուսափել բաց առճակատմանը վերադառնալուց»,- ասված է հայտարարության մեջ:

Իրենց հիմնավորման մեջ ՄՃԽ ներկայացուցիչները նշում են, թե ներկայումս լավատեսության հիմքեր կան, և միևնույն ժամանակ մտավախություն են հայտնում, թե հրադադարի ռեժիմի պարբերական խախտումները կարող են վերաճել լայնամասշտաբ հակամարտության:

Չնայած միջազգային ոչ կառավարական կազմակերպության փորձագետների միանշանակ պնդումներին` Հայաստանի քաղաքական և փորձագիտական շրջանակների ներկայացուցիչները հակված չեն կիսել դրանք: Հայ գործիչները միաբերան պնդում են, որ այդ կերպ ՄՃԽ-ն փորձում է ճնշում բանեցնել հակամարտության կողմերի վրա, ընդ որում` իր ֆինանսավորողների ուղղորդմամբ:

Panorama.am-ի հետ զրույցում ՀՅԴ ներկայացուցիչ Կիրո Մանոյանն այս կապակցությամբ ասաց.

«Միջազգային ճգնաժամային խումբը այն լծակներից մեկն է, որը նման դեպքերում հատկապես, հրապարակում է, իր այսպես կոչված զեկույցները: Այսպես կոչված եմ ասում, որովհետև դա որոշ շրջանակների կողմից արտահոսք է` որոշ չափով խեղաթյուրված, իսկ մնացածն իրենց եզրակացություններն են, մեկնաբանությունները: Պարզ է որ` իրենց կողմից, ավելի ճիշտ` իրենց հովանավորող պետությունների կողմից: Սա ճնշում է կողմերի վրա, այս դեպքում, ես կասեի` բավական մեծ չափով Հայաստանի վրա: Եվ որովհետև հարցը միայն հայկական կողմով չէ, որ պիտի կարգավորվի, կարելի է նաև եզրակացնենք, որ Ադրբեջանի վրա ևս ճնշում է բանեցվում այս ձևով, որպեսզի րոպե առաջ այդ այդ հիմնարար սկզբունքների շուրջ կողմերը դրական եզրակացության հանգեն»:

Միջազգային հարաբերությունների փորձագետ Արա Պապյանը ևս կարծում է, որ գործ ունենք ճնշման փորձի հետ:

«Ինձ թվում է, դա ճնշման այն միջոցներից մեկն է, որ մեր վրա իրականացվում է` անընդհատ սարսափեցնելու, վախեցնելու համար: Ինձ չի թվում, որ սկզբունքները եթե չհամաձայեցնեն, որևէ պատերազմ կսկսվի: Որովհետև պատերազմը հենց այնպես չեն սկսում: Դրա համար պետք են ռազմաքաղաքական հնարավորություններ, որոնք այսօր չկան: Մեր դիրքերն այնքան ամուր են, որ երեքից հինգ անգամ առավելություն Ադրբեջանը չի կարող կենտրոնացնել այդ ճակատում, դա ակնհայտ է: Եթե չի կարողանա կենտրոնացնել, դա նշանակում է, որ հարձակման չի կարող անցնել: Հավատացեք մի մարդու, որը 3 տարի եղել է ՍՍՀՄ գլխավոր շտաբի 10-րդ վարչության սպա Աֆղանստանում և ղեկավարել է կորպուսի մակարդակով ռազմական գործողություններ: Դա այդքան հեշտ չի: Պատերազմ սկսելու համար հսկայական աշխատանք է պետք»,- նշեց Արա Պապյանը:

Քաղաքագետ Գագիկ Հարությունյանի կարծիքով ևս «պատերազմի անխուսափելիությունը» ուռճացված գնահատական է: «Կարծում եմ, դա հոգեբանական, տեղակատվական ճնշման ձև է, որ օգտագործում է այդ խումբը և ոչ ավելին: Պատերազմ չլինելու երաշխիքը հայկական զինված ուժերն են: Եթե դա չունենայինք, վաղուց հարձակված կլինեին: Դա ճնշում է մեր և Ադրբեջանի վրա»,- ասել է նա:

Ի դեպ, Panorama.am-ի զրուցակիցներից ոմանք նկատեցին, որ պատերազմից խուսափելու համար լավ կլինի, որ նախ փակվեն այն կառույցներն ու կազմակերպությունները, որոնք յուրաքանչյուր պատեհ կամ անպատեհ առիթով պատերազմի մասին են հիշատակում կամ անհիմն տեղը հոռետեսական կանխագուշակումներ են անում: