Ձեր վստահելի աղբյուրը

Մենք արդեն անդրադարձել ենք այն փաստին, որ Բուրսայում տեղի ունեցած ֆուտբոլային հանդիպման ժամանակ Հայաստանի ու Թուրքիայի նախագահներ Սերժ Սարգսյանն ու Աբդուլլահ Գյուլը նստած էին կողք-կողքի և ջերմորեն զրուցում էին, քննարկում այս կամ այն խաղային դրվագը:

Հայաստանի նախագահն իր թուրք գործընկերոջը շնորհավորեց Թուրքիայի հավաքականի խփած յուրաքանչյուր գոլի համար: Խաղն առանձին հատված է, այստեղ քաղաքական իրադարձությունները որևէ ազդեցություն չունեն: Հայաստանի և Թուրքիայի մարզական մրցակցությունը, բնականաբար, զերծ է քաղաքականության թելադրանքից և ուրիշ տրամաբանության է ենթարկվում: Այլ հարց է, որ այն ծառայել է հայ-թուրքական հարաբերություների կարգավորման գործին և, անշուշտ, պատմության մեջ կմտնի` առանձնանալով որպես աշխարհի առաջնության ընտրական փուլի շրջանակներում կայացած այնպիսի մարզական դիմակայություն, որն օգնում է հարաբերություններ չունեցող երկրներին` սկսելու երկխոսություն:
Եվ հենց սա է ամենակարևորը:

Իսկ ֆուտբոլային հանդիպումն իր տրամաբանությունն ունի: Ֆաթիհ Թերիմը հրաժարական էր ներկայացրել, և ֆուտբոլիստները, անկախ նանից, թե ով էր մրցակիցը, պետք է ձգտեին հարգանք դրսևորել այնպիսի մի մարդու նկատմամբ, ով շատ բան է արել թուրքական ֆուտբոլի վերընթացի համար: Բացի այդ, եթե ֆուտբոլիստը խաղադաշտ է մտնում պարտվելու զգացումով, երբեք չի կարող ինքն իրեն պրոֆեսիոնալ անվանել: Եվ մենք չպետք է հիմա նստենք ու ամեն ինչ կառուցենք այն մտքի վրա (ինչպես ոմանք դա փորձում են անել,- խմբ.), որ հավաքականի պարտությունը պարտություն է նշանակում բոլոր ճակատներում: Դա պարտվողի հոգեբանություն է և մինչ օրս հատուկ է եղել միայն ադրբեջանցիներին, ովքեր հայ որևէ մարզիկի նկատմամբ հաղթանակը ներկայացնում են որպես հերոսություն: Սպորտում մեր հաղթանակները, նաև` պարտությունները, երբեք նման ենթատեքստ չպետք է ունենան:

Հայաստանի նախագահ Սերժ Սարգսյանը նախ այցելեց հավաքականի ճամբար, որից հետո միայն ժամանեց «Ալմիրա» հյուրանոց` հանդիպելու Թուրքիայի նախագահ Գյուլի հետ: Վերջինս, ի դեպ, բավական երկար ժամանակ էր սպասում իր հայ գործընկերոջը…
Թուրքիայի հավաքականի երկրպագուները, ովքեր ողջ հանդիպման ընթացքում ակտիվորեն աջակցում էին իրենց սիրելի թիմին, խաղի ընթացքում նաև սպիտակ աղավնիներ բաց թողեցին երկինք, ինչը խորհրդանշական է և վկայում է երկու երկրների հարաբերությունների կարգավորմանը միտված գործընթացը բարձր գնահատելու փաստի մասին: Իհարկե, կային նաև այնպիսիները, ովքեր երբեմն-երբեմն իրենց թույլ էին տալիս տհաճ արտահայտություններ կատարել Հայաստանի հավաքականի հասցեին, սակայն մարզադաշտի աշխատակիցներն անմիջապես հայտնվում էին նմանների կողքին և նրանց հորդորում հարգալից լինել հյուրերի հանդեպ: