Ձեր վստահելի աղբյուրը

ԱՄՆ-ի Կոնգրեսում շրջանառության մեջ դրված` Հայոց ցեղասպանությունը ճանաչող թիվ 252 օրինագծի աջակիցների թիվը շարունակում է համալրվել: Այս մասին հայտնում են Ամերիկայի հայկական համագումարից (ԱՀՀ): Հայկական լոբբիստական կառույցի տվյալներով, Հայաստանի և Թուրքիայի միջև դիվանագիտական հարաբերությունների մասին արձանագրությունների հրապարակումից հետո ևս յոթ կոնգրեսականներ են միացել այս նախաձեռնությանը: Ըստ այդմ, օրինագծի աջակիցների թիվը հասել է 134-ի:

«Համագումարը ողջունում է կոնգրեսականներ Բրայան Բիլբրեյի (Հ-ՔԱ), Էլթըն Գելեգլիի (Հ-ՔԱ), Դարել Իսսայի (Հ-ՔԱ), Սթիվ Իզրաելի (Դ-ՆՅ), Ջոն Հոլի (Դ-ՆՅ), Լորա Ռիչարդսոնի (Դ-ՔԱ) և Մայք Թոմփսոնի (Դ-ՔԱ) աջակցությունը»,- հայտարարել է ԱՀՀ-ի Կոնգրեսի հետ կապերի պատասխանատու Բիանկա Դոդովը (փակագծերում նշված են կոնգրեսականների կուսակցական պատկանելությունն ու այն նահանգը, որտեղից ընտրվել են. «Հ» - Հանրապետական կուսակցությունից, «Դ»` Դեմոկրատական կուսակցությունից, «ՔԱ»` Քալիֆորնիա նահանգից, «ՆՅ»` Նյու Յորք նահանգից):

«Մենք անհամբեր սպասում ենք մարդու իրավունքների ոլորտի այս կարևոր նախաձեռնության շուրջ Կոնգրեսի հետ համագործակցության շարունակմանը»,- իր հերթին ասել է ԱՀՀ գործադիր տնօրեն Բրայան Արդունին: «Հայոց ցեղասպանության ճանաչման գործում ԱՄՆ-ը չպետք է պատանդ մնա Հայաստըանի ու Թուրքիայի միջև հարաբերությունների կարգավորմանը»,- ընդգծել է նա:

Բրայան Արդունին և Բիանկա Դոդովն օրերս հանդիպել են Բրայան Բիլբրեյի հետ և զրուցել են ԱՄՆ-ի հայկական համայնքին հետաքրքրող խնդիրների շուրջ: Բիլբրեյը ցանկություն է հայտնել աշխատել Կոնգրեսի` Հայաստանի աջակցության խմբի և, մասնավորապես, համանախագահներ Ֆրենկ Փալոնեի ու Մարկ Քըրքի հետ, խնդիր դնելով հասնել հայ-ամերիկյան համագործակցության խորացմանն ու կապերի ընդլայնմանը: Այդ հանդիպման ժամանակ կոնգրեսականը վերստին հաստատել է իր աջակցությունը թիվ 252 օրինագծին: «Ես աջակցում եմ բանաձևին»,- ասել է նա:

Աղբյուրի համաձայն, ներկայումս Բրայան Բիլբրեյն անդամակցում է ԱՄՆ Կոնգրեսի Ներկայացուցիչների պալատի Վերահսկողության և կառավարական բարեփոխումների, Վետերանների հարցերով և Գիտության ու տեխնոլոգիաների հարցերով հանձնաժողովներին: Միևնույն ժամանակ նա անդամակցում է Պալատի` Իմիգրացիոն բարեփոխումների և քաղաքականության հարցերով աշխատանքային խմբին:

Մինչ այդ ԱՀՀ Արևմտյան կառույցի տնօերն Եղիգ Քեշիշյանը և Հարավային կառույցի խորհրդի անդամ Ալ Քաբլարոֆը հանդիպում են ունեցել Լոր Ռիչարդսոնի հետ, որի ընթացքում Կոնգրեսի այս անդամը ևս միացել է 252 բանաձևը սատարող խմբին:

«Ես հպարտ եմ, որ աջակցում եմ Հայոց ցեղասպանությունը ճանաչող 252 բանաձևին: Ես կշարունակեմ աշխատել իմ գործընկերների հետ, որպեսզի հաստատենք վաղուց հասունացած այս բանաձևը և հանգիստ չենք լինի, քանի դեռ չենք արել այդ բանը»,- ասել է նա: