Ձեր վստահելի աղբյուրը

Պրոֆեսիոնալ բռնցքամարտի միջինքաշային կարգում աշխարհի նախկին բացարձակ չեմպիոն Ջերմեյն Թեյլորի ներկայացուցիչները հաղորդել են, որ երեկ բռնցքամարտիկն արդեն դուրս է գրվել բեռլինյան հիվանդանոցից, որտեղ հայտնվել էր Արթուր Աբրահամի հետ մենամարտում նոկաուտի ենթարկվելուց հետո: Հիշեցնենք, որ բժիշկները, ինչպես նաև Թեյլորի թիմը, որոշել էին ռիսկի չդիմել և շարունակել բուժումը, քանի որ մարզիկն ուղեղի ծանր ցնցում էր տարել և կարճ ժամանակով կորցրել էր հիշողությունը: Ինչպես երևում է, բժիշկները, այնուամենայնիվ, Թեյլորին խորհուրդ են տվել հետաձգել թռիչքն ԱՄՆ, և մի քանի օր նա իր կնոջ` Էրիկայի հետ միասին կանցկացնի Եվրոպայում:

«Ուզում եմ շնորհակալություն հայտնել երկրպագուներին և բոլոր նրանց, ովքեր անհանգստանում էին իմ առողջության համար: Այժմ ինձ լավ եմ զգում,- նշել է Թեյլորն իր թիմի տարածած մամուլի հաղորդագրության մեջ:- Ցանկանում եմ շնորհավորել Արթուր Աբրահամին հաղթանակի առթիվ և նրան հետագա հաջողություններ մաղթել «Super Six» մրցաշարում: Հիմա պլանավորում եմ հանգստանալ և կնոջս հետ մի որոշ ժամանակ կմնամ Եվրոպայում»:

Առայժմ հայտնի չէ` արդյոք Թեյլորը կշարունակի՞ մասնակցել մրցաշարին, քանի որ արդեն 5-րդ մարտն է ավարտում ծանր նոկաուտով: Դրական որոշման դեպքում Թեյլորը 2010 թ. գարնանը պետք է մենամարտի Անդրե Ուորդի հետ:
Արթուր Աբրահամը, իր հերթին, շատ է ուրախացել, որ իր մրցակիցը դուրս է գրվել հիվանդանոցից: Նա նշել է, որ որոշ ժամանակ հանգստանալուց և հաղթանակը տոնելուց հետո կսկսի նախապատրաստությունը հաջորդ մրցակցի` Անդրե Դիրրելի հետ հունվարին տեղի ունենալիք մենամարտին:

«Առողջությունն ամեն ինչից կարևոր է, և ես շատ ուրախ եմ, որ Ջերմեյնն իրեն լավ է զգում,- Աբրահամի խոսքերը մեջբերել է allboxing.ru-ն:- Ինձ համար պատիվ կլինի հանդիպել նրա հետ: Հույս ունեմ, որ կկարողանամ մի քիչ հանգստանալ իմ մարզչից` Ուլի Վեգներից: Այժմ, երբ գիտեմ, որ Թեյլորի հետ ամեն ինչ կարգին է, կարող եմ տոնել հաղթանակս: Սակայն դա կտևի ընդամենը մի քանի օր, որից հետո կնախապատրաստվեմ Դիրրելի հետ մենամարտին»: