Ձեր վստահելի աղբյուրը

Այսօր Մայր Աթոռ Սուրբ Էջմիածնում` մասնակցությամբ Մայր Աթոռի միաբանների և ՀՀ Կրթության և գիտության նախարար Արմեն Աշոտյանի, տեղի ունեցավ Մայր Աթոռի հովանու ներքո արդեն 8-րդ տարին անցկացվող «Լավագույն ուսուցիչ» ամենամյա հանրապետական մրցույթի հանդիսավոր մրցանակաբաշխությունը: Այս մասին տեղեկացանք Մայր Աթոռ Սուրբ Էջմիածնի տեղեկատվական համակարգից:

«Հայոց լեզու և գրականություն», «Հայոց պատմություն», «Հայոց Եկեղեցու պատմություն» և բնագիտական առարկաների գծով անցկացվող մրցույթի նպատակն է բացահայտել, գնահատել և խրախուսել մասնագիտական խորը գիտելիքներով, ստեղծագործական և դասավանդման հմուտ կարողություններով օժտված ուսուցիչներին: Մրցույթն անց է կացվում հովանավորությամբ Մայր Աթոռի բարերարներ ամերիկաբնակ քույրեր Սիլվա և Իրմա Տեր-Ստեփանյանների:

Հանդիսությունն սկսվել է Տերունական աղոթքով, որին հաջորդել է Մայր Աթոռի Քրիստոնեական դաստիարակության կենտրոնի տնօրեն Տ. Վարդան աբեղա Նավասարդյանի ողջույնի խոսքը: Հայր Սուրբը, բարի գալուստ մաղթելով կրթության մշակներին, անդրադարձել է ուսուցչի կերպարին ու նկարագրին, նրա քրիստոսանման առաքելությանը հայոց ազգային դպրոցից ներս: Հայր Վարդանն ուրախություն է հայտնել, որ Վեհափառ Հայրապետի` ազգային ու բարոյական արժեքների, հայրենասիրության ոգու վրա հիմնված ազգային դպրոց ունենալու և դրանում ուսուցչի կարևոր դերակատարության արժևորման տեսլականը տարեցտարի իրականություն է դառնում:

Մրցույթի անցկացման գործընթացը ներկայացրել է ՀՀ ԿԳ նախարարության հանրակրթական վարչության պետ Նարինե Հովհաննիսյանը, տեղեկացնելով, որ մրցույթին մասնակցել է 300 ուսուցիչ, որոնցից 41-ն են անցել եզրափակիչ փուլ:

Այնուհետև մրցույթի հաղթողներին շնորհավորել է ՀՀ Կրթության և գիտության նախարար տիար Արմեն Աշոտյանը: Իր խոսքում նախարարը բարձր կարևորել է դպրոցի կրթադաստիարակչական գործոնը, ապա անդրադարձել է նախարարության սերտ համագործակցությանը Հայաստանյայց Առաքելական Սուրբ Եկեղեցու հետ և համատեղ իրագործվող ծրագրերին: «Արդիականացնելով կրթությունը և համապատասխանեցնելով այժմյան պայմաններին` չպետք է մոռանանք, որ մեր նման երկրների ու ժողովուրդների համար թիվ մեկ մարտահրավեր է նաև ազգային ինքնության պահպանումն ու հոգևոր-մշակութային դաստիարակությունը, որի իրականացման գործում բացառիկ առաքելություն ունի Հայ Առաքելական Եկեղեցին` ամրագրված սահմանադրորեն: Հայոց կրթության բազմադարյա պահապանը և հովանավորը եղել է Հայոց Եկեղեցին», - նշել է ՀՀ ԿԳ նախարարը:

Ապա Մայր Աթոռի միաբան, ԵՊՀ Աստվածաբանության ֆակուլտետի դեկան Տ. Անուշավան եպիսկոպոս Ժամկոչյանը և ԿԳ նախարար Արմեն Աշոտյանը 39 ուսուցիչների հանձնեցին մրցույթի մասնակցության վկայականներ, դրամական պարգևներ և հոգևոր գրականություն:

Առաջին մրցանակի արժանացան <Հայոց եկեղեցու պատմություն» առարկայի ուսուցչուհի Խաչատրյան Աստղիկը (Գյումրիի թիվ 11 դպրոց), «Հայոց լեզվի և գրականություն» առարկայի ուսուցչուհի Մարգարիտա Խաչատրյանը (Վանաձորի թիվ 5 դպրոց), «Հայոց պատմություն» առարկայի ուսուցչուհի Հասմիկ Գափլանյանը (Վաղարշապատի թիվ 2 դպրոց) և «Կենսաբանություն» առարկայի ուսուցչուհի Անահիտ Գևորգյանը (Հրազդանի թիվ 11 դպրոց): Երկրորդ մրցանակը ստացավ 8 ուսուցիչ: Երրորդ մրցանակ տրվեց 11 ուսուցչի: Մրցանակների արժանացան մրցույթի մասնակից ևս 16 ուսուցիչ:

Հայոց ուսուցչի մեծարման գեղեցիկ այս արարողությունից հետո իրենց սրտի խոսքն են ասել մի շարք ուսուցիչներ: Վերջում Ն.Ս.Օ.Տ.Տ Գարեգին Բ Ամենայն Հայոց Կաթողիկոսի օրհնությունն ու գնահատանքը ներկաներին փոխանցել են Գևորգյան Հոգևոր Ճեմարանի տեսուչ Տ. Սահակ եպիսկոպոս Մաշալյանը: «Օրհնյալ է ուսուցչի գործը, մեր Տեր Հիսուս Քրիստոսի գործի նման է, որովհետև Ինքն էլ Վարդապետ` ուսուցիչ եղավ: Հետևաբար, օրհնյալ է ուսուցչի աշխատանքը, որ մարդ կերտելու գործն է: ...Աշխարհը պիտի փրկի կրթությունը», - ասաց Սահակ Սրբազանը` հորդորելով ուսուցիչներին շարունակել իրենց ծառայությունը, խղճմտանքով ցանել սերմերը կրթության, որպեսզի Հայոց աշխարհը և Սփյուռքը ողողվի հայկական մշակույթի, հայոց գրի ու գրականության լույսով և Աստծո օրհնությամբ:

Արարողության ընթացքում հոգևոր և ազգային երգերի կատարումներով հանդես են եկել Ս. Գեղարդի վանքի երգչախումբը` խմբավարությամբ Անահիտ Պապայանի: