ՀՀ նախագահ Սերժ Սարգսյանը բարձր գնահատեց Վլադիմիր Ենգիբարյանի ծառայությունները

Սպորտ 20:16 29/10/2009

ՀՀ նախագահ Սերժ Սարգսյանը բարձր գնահատեց Վլադիմիր Ենգիբարյանի ծառայությունները

Երևանում այսօր նշվում է բռնցքամարտի օլիմպիական հերթափոխի մարզադպրոցի 50-ամյակը, որի հիմնադիրն է Օլիմպիական չեմպիոն Վլադիմիր Ենգիբարյանը: Մեծարման երեկոյին ներկա է նաև ՀՀ նախագահ Սերժ Սարգսյանը: Նրա հետ միասին ՀՀ կառավարության ընդունելությունների տանը կազմակերպված հանդիսավոր արարողությանը մասնակցում է դպրոցի հիմնադիր Վլադիմիր Ենգիբարյանը, ով դպրոցի 50-ամյակի տոնակատարության առիթով է ԱՄՆ-ից ժամանել Հայաստան:

ՀՀ նախագահ Սերժ Սարգսյանն Օլիմպիական խաղերի չեմպիոն, Եվրոպայի եռակի չեմպիոն, ԽՍՀՄ չեմպիոն և Սպարտակիադայի հաղթող Վլադիմիր Ենգիբարյանին պարգևատրեց «Հայրենիքին մատուցած ծառայությունների համար» առաջին աստիճանի մեդալով: ԼՂՀ նախագահ Բակո Սահակյանի հրամանագրով փառաբանված մարզիկն արժանացավ «Վաչագան Բարեպաշտ» մեդալի: ՀՀ պաշտպանության նախարար Սեյրան Օհանյանը, իր հերթին, Վլադիմիր Ենգիբարյանին պարգևատրեց «Մարշալ Բաղրամյան» գերատեսչական մեդալով: ՀՀ բռնցքամարտի ֆեդերացիան հայաստանյան և միջազգային բռնցքամարտի զարգացման գործում ներդրած անուրանալի ավանդի համար նրան ոսկե մեդալ և հավաստագիր հանձնեց:

ՀԲՖ-ն պարգևատրեց նաև Մոսկվայում բնակվող հայ գործարար Լևոն Հայրապետյանին, ով կազմակերպել էր այս միջոցառումը:

Լրագրողների հետ զրույցում Վլադիմիր Ենգիբարյանը հուզված էր և գոհունակություն հայտնեց, որ իրեն Հայաստանում չեն մոռանում: «Ճիշտ է` ես շատ մեդալներ եմ ստացել, սակայն այսօրվա պարգևներն ինձ համար առանձնահատուկ են: Հպարտ եմ և շատ ուրախ, որ դեռ չեմ մոռացվել: Օգտվելով առիթից` կուզեի երիտասարդ սերնդին կոչ անել ամեն ինչ ներդնել` հայրենիքի պատիվը բարձր պահելու համար»,- հայտարարեց օլիմպիական չեմպիոնը:

Հարկ է ավելացնել, որ 1959 թ. հիմնադրված բռնցքամարտի օլիմպիական հերթափոխի մարզադպրոցը երկար ժամանակ գտնվում էր անմխիթար վիճակում: Միայն վերջերս հարազատ մարզօջախին օգնության ձեռք մեկնեց դպրոցի նախկին սան, գործարար Լեւոն Հայրապետյանը: Նրա ֆինանսական միջոցներով (350 հազար դոլար) հիմնովին վերանորոգվել, ժամանակակից տեսքի են բերվել մարզադպրոցի մարզադահլիճներն ու սանհանգույցը` մարզումների համար նորմալ պայմաններ ստեղծելով շուրջ 500 պատանի բռնցքամարտիկների համար:

Սպասվում է, որ այսօրվա միջոցառման ընթացքում կպարգևատրվեն նաև դպրոցի տնօրեն Սուրեն Ղազարյանը, բռնցքամարտի դպրոցի մարզիչները, ինչպես նաև լավագույն մարզիկները: Դպրոցի սաները ցուցադրական ելույթներ կունենան` դրսևորելով ունակությունների այն ողջ զինանոցը, որ ձեռք են բերել դպրոցում մարզվելու ընթացքում:

Այս միջոցառման, ինչպես նաև ճանաչված մարզական գործիչների մեկնաբանություններին ու գնահատականներին կանդրադառնանք ավելի ուշ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: