Ձեր վստահելի աղբյուրը

Ամբողջ զարգացած աշխարհում գիտությունը խիստ կապերի մեջ է բարձրագույն կրթության հետ, որովհետև վերջինիս մասնագետներն այնտեղից են գալիս: Ինչը փաստորեն գիտելիքահեն տնտեսության գոյության նախադրյալներից է: Ինչպիսի՞ն է իրավիճակը մեզանում:

Այսօրվա ասուլիսի ժամանակ Panorama.am-ի թղթակցի հիշյալ հարցին ԳԱԱ նախագահ Ռադիկ Մարտիրոսյանը պատասխանեց, որ մինչև հիմա գոյություն ունեին համագործակցության տարբեր ձևեր` համատեղ ամբիոններ, ամբիոնի մասեր:


Աշխարհում մեծ պահանջարկ ունեցող բարձորակ մասնագետներն անմիջապես բուհից մտնում են տնտեսություն: Ռ. Մարտիրոսյանն այս առումով նկատեց, որ մեզ մոտ երկար տարիներ շրջանավարտը գալիս էր հետազոտական ինստիտուտ կամ գործարան և առաջին 1-2 տարվա ընթացքում չէր կարողանում մտնել պրակտիկ աշխատանքի մեջ, քանի որ չուներ իր գիտելիքը կիրառելու հմտություն:


Այսօր տնտեսվարող սուբյեկտները չեն կարող 2 տարի սպասել: Շուկան շատ արագ փոփոխվում է:

«Քանի որ կրթական համակարգն անմիջապես ի վիճակի չէ պատրաստի բարձորակ մասնագետներ տալու, ուրեմն գործատուն, ում հարկավոր է մասնագետ, միջամտում է այս գործընթացին:

ԵՊՀ-ն, երբ ես այնտեղ ռեկտոր էի, Synopsys ընկերության հետ մտավ պայմաանգրային այսօրինակ հարաբերությունների մեջ»,-ասաց Ռ. Մարտիրոսյանը:

Այն բուհերը, որոնք չունեն լուրջ գիտական հետազոտական կենտորններ, ինչպես նշում է Ռ. Մարտիրոսյանը, չեն կարող ապահովել բարձրորակ մասնագետներ:

«Բոլորս էլ դասախոսներ ենք ունեցել, որոնք տարիներ շարունակ դեղնած թղթերով են եկել դասախոսությունների: Վերջիններս տեղյակ չէին լինում, թե գիտության իրենց բնագավառում ի՞նչ նորարարություններ կան:

Եթե նա այդ նորությունները չհաղորդի իր ուսանողներին, վերջինս էլ չի կարողանա որակյալ մասնագետ դառնալ»,-ասաց բանախոսը:

Հետևաբար այստեղից առաջանում է այսպես կոչված հետազոտական համալսարանների ստեղծման գաղափարը, որն ունի գիտական-հետազոտական հատված: ԳԱԱ նախագահն ափսոսանք հայտնեց, որ մեր բուհերից ոչ մեկն էլ այդպիսի պայմաններ չունի: Խորհրդային տարիներից մեր բուհերի հետազոտական բազան շատ խղճուկ է եղել` համեմատած ԳԱԱ-ի հետ, դրա համար էլ վերջիններս համագործակցել են ակադեմիայի հետ: Ներկայումս բուհերից միայն ԵՊՀ-ն և Հայ-ռուսական համալսարանը ունեն հետազոտական կենտրոններ: Այլ բուհեր էլ այժմ մտածում են ստեղծել հետազոտական կառույցներ: