Ձեր վստահելի աղբյուրը

Հայաստանի շախմատի ազգային հավաքականի առաջատար Լևոն Արոնյանը ադրբեջանական լրատվամիջոցներից մեկին տված հարցազրույցում խոսել է Եվրոպայի թիմային առաջնության մասին, անդրադարձել է այն հարցին, թե ինչու չի ժամանելու Բաքու` մասնակցելու հավակնորդների մրցաշարին, վերլուծել է նաև մայրցամաքային ստուգատեսի շրջանակներում կայացած Հուսեյնով-Սարգսյան պարտիան:

Լևոն Արոնյանը համամիտ չէ, որ Եվրոպայի առաջնությունում Հայաստանի հավաքականի գործերը հաջող չեն ընթացել: Նա վստահ է, որ թիմի վերջնական արդյունքի վրա բացասական ազդեցություն է թողել կուտակված հոգնածությունը: Լևոն Արոնյանը, առաջնորդվելով զուտ մարզական չափորոշիչներով, հայտարարել է նաև, որ Ադրբեջանի հավաքականը վաղուց արդեն պետք է տիրացած լիներ մայրցամաքի չեմպիոնի կոչմանը, քանի որ իր կազմում բարձրակարգ խաղացողներ ունի:

Այնուամենայնիվ, Հայաստանի ընտրանին կարողացավ պարտության մատնել ապագա չեմպիոնին: «Դրանք շատ բարդ պարտիաներ էին: Ես ոչ-ոքի խաղացի Ռաջաբովի հետ, երկրորդ և չորրորդ խաղատախտակների վրա նույնպես միավորը կիսվեց: Բայց Սարգսյանին հաջողվեց հաղթել: Գադիր Հուսեյնովն իսկապես առավելություն ուներ, սակայն սխալ թույլ տվեց: Իսկ Սարգսյանը շատ փորձառու է, գիտի, թե ինչպես պետք է բեկի պարտիայի ընթացքը, ինչը և արեց: Ընդհանուր առմամբ` Ադրբեջանի հավաքականի հաղթանակն ինձ համար անսպասելի չէր, իսկ ահա Ուկրաինան զարմացրեց: Այդ թիմն այնքան կայուն չէր խաղում, որպեսզի զբաղեցներ մրցանակային երրորդ տեղը: Նրանց, եթե անկեղծ լինենք, ես չէի տեսնում մրցանակակիրների շարքում»,- հայտարարել է Լևոն Արոնյանը:

Իսկ թե ինչու չի ցանկացել մասնակցել Բաքվում տեղի ունենալիք աշխարհի չեմպիոնի կոչման հավակնորդների մրցաշարին, Լևոն Արոնյանն այսպես է պատասխանել. «Եկեք իրատես լինենք. Բաքվի ու Ադրբեջանի հանդեպ ողջ հարգանքով հանդերձ` ես դժվար թե ինձ այնտեղ հարմարավետ զգայի»: Լրագրողը, իհարկե, նշել է, որ անվտանգության երաշխիքներ տրված էին, ի վերջո, հայ ըմբշամարտիկները ժամանել են Բաքու, ադրբեջանցի ձյուդոյիստները` Երևան: Լևոն Արոնյանն ստիպված է եղել բացատրել, թե ինչով է շախմատը տարբերվում ձյուդոյից ու ըմբշամարտից:

«Մի համեմատեք: Նրանց հենց դա էր պետք, նման ադրենալինի պես ինչ-որ բան: Շախմատիստները շատ դժվար են հոգեբանորեն տրամադրվում: Եթե անհրաժեշտ լիներ թուլանալ և դուրս գալ` զբոսնելու, Բաքվում դժվար թե կարողանայի դա անել հանգիստ հոգով, ինչը շատ ուժեղ կանդրադառնար իմ արդյունքների վրա: Այնպես որ, Բաքու գալն իրատեսական չէ»: