Ձեր վստահելի աղբյուրը

Ձմռանը, երբ ինֆեկցիոն հիվանդությունները առավել շատ են գլուխ բարձրացնում, դրանց դիմակայելու ու չհիվանդանալու համար պետք է ուտել առողջ, ռացիոնալ, բալանսավորված սնունդ: Առողջապահության նախարարության ֆիզիկական բժշկության և կուրորտաբանության գիտահետազոտական ինստիտուտի դիետոլոգ Վարդանուշ Պետրոսյանը Panorama.am-ի թղթակցի հետ զրույցում ասաց, որ իմունիտետը բարձր պահելու համար պետք է կազմել ճիշտ սննդակարգ և սնվել վիտամիններով հարուստ սնունդով:

«Մարդ պետք է ամեն ինչ ուտի, որպեսզի ստանա իր համար անհրաժեշտ սպիտակուցներ, հանքային աղեր, վիտամիններ, ածխաջրեր, ճարպեր: Դա նշանակում է` ունենալ առողջ իմունիտետ, նորմալ աշխատող նյարդային համակարգ, որպեսզի դիմակայի վիրուսներին», հավելեց դիետոլոգը:

Մոնոդիետա ընդունողներին մասնագետը խորհուրդ տվեց արագորեն հրաժարվել դրանից ու կարևորեց A, C, E վիտամինների ամենօրյա օգտագործումը: «Իմունհամակարգն ավելի ակտիվացնում են, ուժեղացնում են` գազարը, ցիտրուսները, բուսական ձեթը, կարագը: Բայց բոլորը չափի մեջ: Օգտագործեք ընդեղեն` լոբի, ոսպ: Հանքային աղերի հարուստ աղբյուր է բանջարեղենը, ամեն օր կանաչ բանջարեղեն օգտագործեք», -խորհուրդ տվեց Վարդանուշ Պետրոսյանը:

Շաբաթական գոնե երկու անգամ, ըստ դիետոլոգի, պարտադիր է մսեղենի օգտագործումը:

Մեր զրուցակից մասնագետը սննդի հետ միասին չի մոռանում նաև հեղուկները` պետք է մեծ քանակությամբ հեղուկներ օգատագործել` օրական 2,5 լիտր անկախ տեսակից` թեյ մեղրով ու բուսական խառնուրդով, ջուր, առանց շաքարի կոմպոտներ և որքան հնարավոր է քիմիական, վերամշակված սննդից, փողոցային սնունդից` «ֆաստֆուդ»-ից`  հեռու մնալ:
«Փողոցային ուտելիքը ուտելու բան չէ, պետք է ոչ թե խուսափել դրանից այլ` բացառել դա սննդակարգից», -նկատեց մասնագետը:

Ըստ նրա, իմունիտետի բարձրացման հոյակապ միջոց է նաև օրական զբոսանքը մաքուր օդում, բնության հետ շփումը և ամենակարևորը` չպետք է նյարդային վիճակում լինել: