Ձեր վստահելի աղբյուրը

Հայաստանում խոզի գրիպի լաբորատոր ստուգումների արդյունքում հաստատված 3 դեպքերի վերաբերյալ վերջնական վերահաստատված պատասխանը Լոնդոնում գտնվող տարածաշրջանային ռեֆերենս լաբորատորիայից Հայաստան կհասնի միայն մեկ ամսից:

Այս մասին այսօր կառավարությունում տեղի ունեցած ասուլիսում ասաց առողջապահության նախարար Հարություն Քուշկյանը:

Նախարարը պարզաբանեց, որ Առողջապահության համաշխարհային կազմակերպության պահանջով, երկրում գրանցված առաջին` առնվազն տասը դեպքերը պետք է վերահաստատվեն նաև Լոնդոնում գտնվող տարածաշրջանային ռեֆերենս լաբորատորիայում:


«Այժմ նմուշները գտնվում են այնտեղ, որոնց պատասխանը հանրապետություն կուղարկվի մեկ ամսից»,-ասաց Հ. Քուշկյանը:

Սակայն, ինչպես նախարարը նշեց, դա չի նշանակում, որ Հայաստանում գործող լաբորատորիաները թերի են կամ կատարած հետազոտություններն անորակ են:

«Բոլոր զարգացած երկրների լաբորատերիաները, լինի դա խոզի գրիպ հետ կապված դեպք, թե այլ, պարտադիր կարգով լրացուցիչ անալիզներ են կատարում, որ արդյունքները ճշգրիտ լինեն»,-նշեց նա:

Հ. Քուշկյանը հիշեցրեց, որ հանրապետությունում խոզի գրիպի առաջին դեպքը արձանագրվել է Իրանի քաղաքացու մոտ: Վերջինս դիմել է մայրաքաղաքային հիվանդանոցներից մեկին, որտեղից էլ ուղեգրվել է «Նորք» ինֆեկցիոն հիվանդանոց:

Հիվանդանոցում, ինչպես նշեց նախարարը, լաբորատոր հետազոտություններով հասատվել է ախտորոշումը: Այժմ Իրանի այդ քաղաքացին բուժումն ընդունելուց հետո դուրս է գրվել հիվանդանոցից ու մեկնել Իրան:


Բացի սա, նախարարությունը հաստատել է խոզի գրիպով հիվանդության ևս երկու դեպք: Ինչպես նախարարը նշեց, խոսքը վերաբերում է Մոսկվայից վերադարձած երկու հայերին, որոնց մոտ հիվանդության ախտանիշերը հայտնաբերվել են օդանավակայանում տեղադրված ջերմացույց սարքի միջոցով: Նրանց առողջական վիճակը, ինչպես վստահեցնում է նախարարը, ներակայումս մասնագետները բավարար են գնահատում:

Վերջում, Հ. Քուշկյանը ևս մեկ անգամ հայտարարեց, որ խուճապի մատնվելու համար առիթ չկա: Պարզապես նա խորհուրդ տվեց ավելի զգույշ լինել, օրվա ընթացքում շատ հեղուկ օգտագործել, վիտամիններով հարուստ սննդամթերք օգտագործել: Իսկ գրիպի ախտանշանների դեպքում, անմիջապես, դիմել մասնագետի:


Հիշեցնենք, որ նախարարությունում խոզի գրիպի դեմ պայքարի համար ստեղծվել է միջգերատեսչական շտաբ, որը համակարգում է փոխնախարար Հայկ Դարբինյանը: Ավելացնենք, նաև, որ Ա գրիպի ախտանշանները նույնն են, ինչ սեզոնային գրիպի դեպքում է` բարձր ջերմություն, ընդհանուր թուլություն, ախորժակի բացակայություն և հազ, իսկ որոշ դեպքերում, հնարավոր են նաև այլ ախտանիշներ` ինչպիսիք են օրինակ` քթից արտադրությունը, կոկորդի ցավը, սրտխառնոցը, փսխումը կամ փորթուլությունը: