Ձեր վստահելի աղբյուրը

Ավանդական ջազը երբեք չի մահանում: Այս մասին ասուլիսում հայտարարեց ժամանակակից ջազի լեգենդ Ջորջ Բենսոնը: «Ինչպես ավանդական ջազում, այնպես էլ դասական երաժշտությունում կան հզոր երաժիշտներ և կոմպոզիտորներ, և այդ երաժշտությունները երբեք չեն մահանում»,- նման համոզմունք հայտնեց նա:

Նա նաև ասաց, որ ջազը հզոր է նաև այն պատճառով, որ իր մեջ ներառում է մեկ կարևոր էլեմենտ, որով էլ տաբերվում է երաժշտական այլ ուղղություններից. դա իմպրովիզացիայի պահն է և հենց այն էլ թույլ է տալիս ամեն անգամ մատուցել նոր երաժշտություն, ինչպես նաև կատարելագործման հնարավորություն է տալիս:

Երաժիշտն ասաց, որ կիթառի հետ կապված ամենատպավորիչ հիշողությունը Չարլի Քրիսչենի և Բեննի Գուդմենի համատեղ ելույթն էր:
«Իմ ամբողջ կյանքի ընթացքում դա չափանիշ դարձավ: Ես համոզված չեմ, որ երբևէ կարող եմ մոտենալ այդպիսի մակարդակի: Հանուն դրա արժե մահանալ»,- ասաց Ջ. Բենսոնը:

Ջազի լեգենդը նշեց, որ երեկ ջազ ակումբում լսել է հայ երաժիշտների ու եկել այն եզրակացության, որ Հայաստանում շատ են պրոֆեսիոնալ կատարողները: Նա ասաց, որ ԱՄՆ-ում շատ հայ ընկերներ ունի:

Երաժիշտը տեղեկացրեց, որ այսօրվա համերգում հնչելու են իր հին ու նոր ստեղծագործությունները` տարբեր ոճի և ուղղությունների, քանի որ, նրա կարծիքով, յուրաքանաչյուր հանդիսատես ունի իր պատկերացումը` ինչպիսին է Ջորջ Բենսոնը:

«Երբ ես փորձում են շեղվել դեպի դասական երաժշտություն, ապա թշնամիներ եմ ձեռք բերում»,- նկատեց նա ու հավելեց, որ այդ իսկ պատճառով կպահի հավասարակշռությունը և կներկայացնի տարբեր ոճերի երաժշտություններ, ինչը նրան դուր է գալիս, քան որ նա ռոմանտիկ է, սվինգի, իմպորվիզացիների և նոր մոտեցումների սիրահար:
Նշենք, որ համերգը տեղի է ունենալու «21-ի հեռանկարներ» տասներորդ երաժշտական միջազգային փառատոնի շրջանակներում: Ինչպես ասաց փառատոնի տնօրեն Ստեփան Ռոստոմյանը, փառատոնն ընդլայնում է իր ֆորմատը և դասական երաժշտության հետ համատեղ նախատեսում են անցկացնել ջազ երաժշտության համարգային շարք, որը հենց բացվում է Ջորջ Բենսոնի այսօրվա համերգով:

Համերգը տեղի է ունենալու Կարեն Դեմիրճյանի անվան մարզահամերգային համալիրում: Այն անց է կացվում ՀՀ նախագահ Սերժ Սարգսյանի բարձր հովանու ներքո, ՀՀ մշակույթի նախարարության աջակցությամբ: Հովանավորն է «Ամերիաբանկը», իսկ կազմակերպիչն է «Շարմ» ընկերությունը:

Ջորե Բենսոնը ծնվել է 1943 թ. մարտի 22-ին: Ջորջ Բենսոնը իր քառասնամյա փայլուն երաժշտական կարիերայի ընթացքում, իրավամբ, հռչակվել է անզուգական ջազ-կիթառահար և վոկալիստ: Տասը անգամ Գրեմմի մրցանակի արժանացած Ջորջ Բենսոնը լավագույն կիթառահարներից է ջազի պատմության մեջ, ում կատարողական ներկապնակը մշտապես աչքի է ընկել ոճային բազմազանությամբ` սվինգից մինչև հիպ-հոպ, ջազ-ռոքից մինչև smooth-ջազ, ռիթմ-ենդ-բլյուզից մինչև փոփ-երաժշտություն:

Երաժշտության աշխարհը գրավել է Բենսոնին վաղ պատանեկությունից: 1964-ին առաջին սոլո-ալբոմի թողարկումը համարվում է երաժշտի պրոֆեսիոնալ ճանապարհի մեկնարկը, որից հետո մինչ օրս թողարկվել է ավելի քան 60 ձայնասկավառակ և 30 սինգլ: Այդ թվում 1976թ-ին թողարկված «Breezin» ձայնասկավառակը առաջին ջազային ալբոմն է պատմության մեջ, որն իր վաճառքի ցուցանիշների շնորհիվ դարձել է «Պլատինե ձայնասկավառակ»: Վերջին տարիներին լույս տեսած ձայնասկավառակներն են Absolute Benson (2000), Irreplaceable (2004), Givin’ It Up (2006), ինչպես նաև հանրահայտ Ալ Ջերոյի հետ ձայնագրված դուետը, որն արժանացել է Գրեմմի մրցանակի: