Ձեր վստահելի աղբյուրը

Մայրաքաղաքի «Շտապ օգնության» «1-03» ծառայությունում վերջերս ավելացել են ջերմության բարձրացման ու հարբուխի նախանշանների հետ կապված ահազանգերի թիվը: Այս մասին Panorama.am-ին ասաց «1-03» ծառայության փոխտնօրեն Նունե Ժամկոչյանը:

Նրա խոսքով, հատկապես ավելացել են գիշերվա կանչերը: Եթե մեկ ամիս առաջ ծառայությունը գիշերները գրանցում էր 110, 120 կանչ, ապա այժմ, մասնավորապես երեկ և այսօր գիշեր գրանցվել է 180, 185 կանչ:


«Կապված վերջին իրարանցման հետ` խոզի գրիպի, անհանգստությունը քաղաքացիների մոտ ավելացել է: Նրանք հեռուստատեսությամբ լսում են, որ ջերմության բարձրացման դեպքում կարելի է նաև մեր ծառայությանը դիմել ու տեսեք, օրինակ` այս շաբաթ և կիրակի օրերին, երբ պոլիկլինիկաներում գիշերային հերթապահություն չկա, զանգերի թիվը շատ էին»,-ասաց Ն. Ժամկոչյանը:

Ըստ նրա, եթե շտապ օգնությունում ամռան ամիսներին կանչերի նվազեցում էր նկատվում, ապա այժմ` եղանակների փոփոխության հետ կապված, երբ խրոնիկ հիվանդությունները սրանում են, կանչերի թիվն ավելացել է:

Աշնան ամիսները, «Շտապ օգնություն» ծառայության համար պիկ շրջան են համարվում:

Այսպիսով` այս տարի, ծառայությունում կանչերի աճ է գրանցվել: Նոյեմբերի 14-ին ծառայությունը գրանցել է 514 կանչ, իսկ անցյալ տարի նույն օրը` 459: Այս տարվա նոյեմբերի 15-ին գրանցվել է 540, իսկ 2008-ի նոյենմբերի 15-ին` 423 ահազանգ:

Մինչդեռ, դեռևս այս ամսվա սկզբի` նոյեմբերի 1-ի տվյալներով, ինչպես նշում է ծառայության փոխտնօրենը, կանչերի թիվն ընդհամնը 398-400-ի է հասել:

Այսպիսի «ակտիվության» պատճառը, Ն. Ժամկոչյանը, բնակչության անհանգստության մեջ է տեսնում:

«Մարդիկ, հաղորդումները դիտում են ու անհանգստանում են: Բայց պետք է ասել, որ իսկապես, անհանգստանալու կարիք չկա: Այն ժամանակ, երբ խոզի գրիպի մասին ոչինչ չկար, սովորական գրիպի համար մարդիկ մեզ չէին դիմում, բայց չգիտեին, որ սեզոնային գրիպի դեպքերը, անցտալ տարիների այս ամիսներին, ավելի շատ էին գրանցվում: Պարզապես, դրանից անհանգստացողներ չկային»,-նկատեց փոխտնօրենը:

Բացի այդ, նա նշեց, որ գրիպի նախանշաններով ու ջերմության բարձրացման մասով գրանցված կանչերից ոչ մեկը խոզի գրիպի նախանշաններ չեն ունեցել և ոչ մի հիվանդ «Նորք» ինֆեկցիոն չի ուղեգրվել:

Նշենք նաև, որ «Շտապ օգնության» «1-03» ծառայությունում այս ժամանակահատվածում գրանցված մյուս կանչերը, հիմնականում, վերաբերել են սրտանոթային, սիրտ-թոքային ու խրոնիկ այլ հիվանդությունների սրացմանը: