Ձեր վստահելի աղբյուրը

Առողջապահության նախարարի օգնական Շուշան Հունայնանը այսօր Panorama.am-ին հայտնեց, որ հանրապետությունում խոզի գրիպով վարակվածների թիվը հասել է 15-ի:

Շ. Հունանյանի տեղեկացմամբ, նոր հայտնաբերված 4 հիվանդները նույնպես բուժումը ստանում են «Նորք» ինֆեկցիոն հիվանդանոցում:

Մասնագետները նրանց առողջական վիճակը բավարար են գնահատում: Ներկայումս հիվանդանոցում բուժումը շարունակում են 8 հիվանդներ: Ինչպես նշեց Շ. Հունանյանը, հանրապետության գլխավոր ինֆեկցիոնիստն ասել է, որ հնարավոր է, հիվանդներից մի քանիսն այսօր դուրս գրվեն:

Հիշեցնենք, որ hանրապետությունում շարունակվում է վարակի հետագա ներբերման և տարածման կանխարգելմանն ուղղված հակահամաճարակային միջոցառումների իրականացումն ու ուղևորների առողջության նկատմամբ մոնիթորինգը:

Նշենք նաև, որ հանրապետությունում խոզի գրիպի դեմ հատկացվող «Տամիֆլյու» դեղամիջոցը հիվանդին տրվում է պետպատվերի շրջանակներում` անվճար և միայն բժշկի նշանակմամբ: Բացի այդ` ցանկացած պոլիկլինիկա, բուժհաստատություն դիմած քաղաքացին անվճար հետազոտության և բուժման իրավունք ունի:

Ի դեպ, Առողջապահության համաշխարհային կազմակերպության (ԱՀԿ) տվյալների համաձայն, աշխարհում առկա է խոզի գրիպով վարակվածության 503 հազար 536 լաբորատոր հաստատված դեպք, որոնցից շուրջ 6000-ը մահվան ելքով են ավարտվել: