Ձեր վստահելի աղբյուրը

Առողջապահության համաշխարհային կազմակերպությունը (ԱՀԿ) «խոզի գրիպի» դեմ պայքարելու համար Հայաստանին 300 դոզա պատվաստանյութ է խոստացել: Այն միանգամից Հայաստան չի բերվի, այլ` յուրաքանչյուր անգամ 2 տոկոսի չափով հինգ ներկրումով: Իմունականխարգելման ազգային ծրագրի ղեկավար Գայանե Սահակյանն ասում է, որ հնարավոր է մինչև դեկտեմբերի վերջ պատվաստանյութը հասնի մեր երկիր:

ԱՀԿ ուղարկած պատվաստանյութով պատվաստվելու են խոցելի խմբերը, իսկ որպես այդպիսիք, ըստ Սահակյանի, առանձնացվել են բուժաշխատողները, խրոնիկ հիվանդություն ունեցող անձինք, մինչև 25 տարեկան առողջ բնակչությունը, հնարավոր է նաև` հղիները:

«Ելնելով պատվաստանյութի քանակից, մենք այս խմբերի շրջանակում պատվաստում կիրականացնենք», ասում է Սահակյանը:

-Ռիսկային չէ՞ հղիներին պատվաստելը:

«Պատվաստանյութի երկու տեսակ կա` մեկն իսկապես խորհուրդ չի տրվում, իսկ մյուսը տրվում է: Այսօր մենք աշխատանքներ ենք տանում, որպեսզի փնտրենք գտնենք հղիների համար պատվաստանյութ, բայց առայժմ չեմ կարող ասել` կգտնե՞նք պատվաստանյութ հղիների համար, թե՞ ոչ», -նկատում է Գայանե Սահակյանը:


Տիկին Սահակյանի խոսքերում, թերևս, մխիթարական մի բան կար` «համատարած վակցինացիա չի սպասվում»: Սա մխիթարական է հատկապես կարմրուկի և կարմրախտի դեմ առողջապահության նախարարության կազմակերպած համատարած պատվաստումներից հետո, երբ արձանագրվեցին բազմաթիվ ծանր ու նաև` ողբերգական դեպքեր: Մասնավորապես, Panorama.am-ը բազմիցս է անդրադարձել «Բոլորս դեպի պատվաստումներ» ակցիային ու դրա ծանր հետևանքներին` մատնանշելով բազմաթիվ օրինակներ, երբ պատվաստումներից հետո հղի կանանց բժիշկներն իրենք էին խորհուրդ տալիս դիմել արհեստական ընդհատման, հակառակ դեպքում երեխան արատներով կծնվի: (ՉԻ ԿԱՐՈՂ ՊԱՏԱՀԵԼ. ԲՈԼՈ՞Ր 6- 27 ՏԱՐԵԿԱՆՆԵՐԸ ՊԵՏՔ Է ՊԱՏՎԱՍՏՎԵՆ ,   ԾՆՈՂՆԵՐ. «ԲԺԻՇԿՆԵՐԸ ԼԱՎ ՊԱՏՐԱՍՏՎԱԾ ՉԵՆ»  ՊԱՏՎԱՍՏՈՒՄՆԵՐԻ «ԳԼԽԱՎՈՐ» ՀԵՏԵՎԱՆՔՆԵՐԸ ՆՈՐ ԵՆ Ի ՀԱՅՏ ԳԱԼԻՍ. ԿՊԱՏԺՎԵ՞Ն ՄԵՂԱՎՈՐՆԵՐԸ )

Նկատենք, որ «Բոլորս դեպի պատվաստումներ»-ի ժամանակ այդքան մարդասեր բժիշկները չէին զգուշացնում, որ պատվաստումն հակացուցված է հղի կանանց, ալերգիկներին: Իսկ հետո, երբ գլխի ընկան, որ պետք է զգուշացնել, արդեն ուշ էր. շատ հղիներ դիմեցին հղիության արհեստական ընդհատման, իսկ ալերգիայով տառապող մարդիկ էլ ունեցան բարդացումներ: Փաստերը բազմաթիվ են:

Այսքանից հետո «խոզի գրիպի» դեմ պատվաստումների մասին տեղեկությունները որոշ մտահոգություն են առաջացրել բնակչության շրջանում: Շատերը մտավախություն ունեն` «կարմրուկի օրը չընկնե՞նք»:


Ինչևէ, արձանագրված նման բազում դեպքերից հետո առողջապահության ոլորտի ներկայացուցիչը այդ ակցիան ձախողված չի համարում: Ավելին, մատնանշում է ցուցանիշ.

«Եթե ձախողված լիներ, պատվաստումներում բնակչության ընդգրկվածությունը չէր կազմի 97 տոկոս»: Իսկ հղիության արհեստական ընդհատումների վերաբերյալ մեր դիտարկմանն ի պատասխան, Սահակյանն ասաց. «Աբորտներ միշտ էլ եղել են»:

Ինչպե՞ս են առողջապահության կազմակերպիչները վստահություն ներշնչելու, որպեսզի մարդիկ պարտադրված չլինեն ու իրենց կամքով պատվաստվելու ցանկություն հայտնեն:

Գայանե Սահակյանն ասում է, որ առողջապահության նախարարությունում աշխատանքային խումբ է ձևավորվում, որի յուրաքանչյուր անդամ կունենա իր պարտականությունը` պատվաստումներից առաջ խումբը կաշխատի բնակչության հետ իրազեկման աշխատանքներ տանելու համար:

«Սկսեցիք մարդկանց կարմրուկ-կարմրախտով վախեցնել», դժգոհում է տիկին Սահակյանն ու հավելում. «Այս պահին ես կոնկրետ չեմ կարող ասել, թե ինչ վակցինա է գալու Հայաստան: Երբ վակցինան ստանանք, կոնկրետ ուղերձներ կհղենք բնակչությանը: Դա ավելի ուշ կլինի: Աշխատանքային խումբը հենց ստեղծվում ա նրա համար, որպեսզի տեղեկատվական բնույթի նյութեր մշակեն` բնակչությանն իրազեկելու համար»:

Պատվաստանյութի բարձր որակը Գայանե Սահակյանը երաշխավորում է, քանի որ «դա ԱՀԿ կողմից հավաստագրված վակցինա է լինելու»: «Ըստ ԱՀԿ տեղեկատվության, եթե նախաորակավորման փուլն անցել է, հավաստագրվել է, ապա անվտանգության վերաբերյալ հարցեր չկան», -վստահ է գայանե Սահակյանը:


Իսկ մինչև պատվաստանյութը «կժամանի» Հայաստան, հիշեցնենք, որ խոզագրիպի հիմնական ախտանիշներն են` բարձր ջերմություն, գլխացավ, մկանային ցավ, հազ, անգինա, հնարավոր է նաև փսխում և ձիարեա (լուծ): Մարդկանց խորհուրդ է տրվում հաճախակի լվացվել օճառով, օգտագործել շատ հեղուկ, չհամբուրվել, չօգտագործել ուրիշի շրթներկը, բջջային հեռախոսը: