Ձեր վստահելի աղբյուրը

Ֆրանսահայ ռեժիսոր Ռոբեր Գեդիկյանը, ով «Ոճրագործության բանակ» ֆիլմի հայաստանյան պրեմիերայի առիթով ժամանել է Հայաստան, լրագրողների հետ հանդիպման ժամանակ մանրամասն ներկայացրեց` ինչի մասին է ֆիլմը:

«Սա Ֆրանսիայի պատմության դրվագներից մեկն է, որը շատ կարևոր է: Պատմությունը տեղի է ունեցել Երկրորդ աշխարհամարտի ժամանակ, երբ իրենց բռնապետություններից փախած իտալացիները, իսպանացիները, լեհերը, ռումինացիները, հունգարացիները, հայերը գնացել էին Ֆրանսիա` ֆրանսիական հեղափոխության, հույսի, ազատության երկիրը, ու հանկարծ հայտնվում են գերմանական ֆաշիստական բանակի լծի տակ: Բոլոր 23 օտարերկրացի երիտասարդները 17-19 տարեկան էին: Նրանք սկզբում միայնակ էին, հետո, խմբվելով ջոկատների մեջ, առաջինն էին, որ սկսեցին պայքարել ֆաշիստական զավթիչների դեմ: Նրանք հետագայում ձերբակալվեցին ֆրանսիական ոստիկանության կողմից, քանի որ Ֆրանսիայի կառավարության մի մասն այդ ժամանակ համագործակցում էր ֆաշիստական Գերմանիայի հետ: Ձերբակալվելուց հետո նրանց խոշտանգել են, այնուհետև մի մեծ կարմիր աֆիշայի վրա փակցրել նրանց լուսանկարները, գրել անունները, ազգությունները, ու որ արտասահմանցի այս ավազակները պայքարում են ֆրանսիական պետություն դեմ ու տակը գրված է եղել` «ոճրագործության բանակ»: Ջոկատի հրամանատարը, ղեկավարը եղել է Միսակ Մանուշյանը: Նրանք, իհարկե, գնդակահարվում են, սակայն նրանք ունենում են կողմնակիցներ, որոնք փախչում են տարբեր շրջաններ ու այնտեղ գործունեություն ծավալում: Նրանցից երկուսը դեռ ողջ են»:

Ռ. Գեդիկյանն ասաց, որ համաշխարհային պատմության մեջ ամենագեղեցիկ նամակը Միսակ Մանուշյանի նամակն է իր կնոջը` գրված մահվանից մի քանի ժամ առաջ: Նամակի վերջում նա գրել էր. «Ես ուղղակի մի բան գիտեմ, որ ոչ մի ատելություն չունեմ գերմանացի ժողովրդի նկատմամբ»: «Իմ մայրը գերմանացի է, և այս վերջին նախադասությունը, որ ատելություն չկա, ինձ համար շատ կարևոր է»,- ասաց ռեժիսորը:

«Ես իմ ֆիլմում շեշտել եմ, որ պայքար է ընթացել ոչ թե գերմանացիների, այլ ֆաշիստների, նացիստների դեմ: Ուզել եմ ցույց տալ, որ երիտասարդները հասկացել են` ինչ է մարդասիրությունը, մարդակային գաղափարները, որ նրանք ատել են ոչ թե ժողովրդին, այլ ֆաշիստներին: Դրանով իսկ ապացուցվեց, որ նրանք, լինելով տարբեր ազգության, տարբեր հավատի տեր երիտասարդներ, մարդկային արժեքներն ավելի բարձ են գնահատել, քան մարդկային կտտանքները»,- ասաց ֆիլմի ռեժիսորը:

Այն հարցին, թե ֆիլում կա՞ ինչ-որ կոչ ուղղված այսօրվա երիտասարդներին, Ռ. Գեդիկյանը պատասխանեց. «Արթնացե´ք: Ես միշտ սիրել եմ այն մարդկանց, ովքեր պայքարում են և հանգիստ չեն»: Իսկ այն հարցին, թե այսօրվա երիտասարդները քնա՞ծ են ու հատկապես ինչի՞ դեմ պետք է պայքարեն, նա պատասխանեց. «Ոչ բոլորը: Դժվար է ասել, թե հատկապես ինչի դեմ պետք է պայքարել, բայց պայքարի ճակատները շատ են. կան տնտեսական, սոցիալական ու քաղաքական հարցեր, որոնց դեմ պետք է պայքարել»:

Ասուլիսին ներկա դերասան Սերժ Ավեդիկյանը, ով մարմնավորել է Միշա Ազնավուրյանին (Շառլ Ազնավուրի հայրը), իր կնոջ` Քնարի (դերակատարուհին` Քրիստինա Գալստյան) հետ շատ են օգնել Միսակ Մանուշյանին և նրա կնոջը` Մելինեին:
Նշենք, որ Միսակ Մանուշյանին մարմնավորել է Սիմոն Աբգարյանը, իսկ Մելինեին` ֆրանսիացի հայտնի մի դերասանուհի: Սիմոն Աբգարյանը նույնպես ժամանելու է Հայաստան:

Դերակատար Արիան Ասկարիդն էլ, ով նույնպես Հայաստանում է, մարմանավորել է այդ երիտասարդներից մեկի մորը, ով պատերազմի ամբողջ ընթացքում շատ է օգնել երիտասարդներին: «Մադամ Էլեկը զարմանահրաշ կին էր: Նա հունգարացի հրեա էր: Պատերազմի ամբողջ ընթացքում Փարիզում ունեցել է ռեստորան` վրան գրված «հրեական ռեստորան»: Շատ ֆաշիստ զինվորներ են եկել այնտեղ հաց ուտելու»,- պատմեց դերասանուհին:

Նշենք, որ ֆիլմը նկարահանվել է 2008 թվականին: Ֆրանսիայում այն ցուցադրվել է սեպտեմբերին, ներկայացվել է նաև Կանի փառատոնում (ոչ մրցութային բաժնում):

Ֆիլմը Երևանում ցուցադրվելու է նոյեմբերի 29-ին (հայերեն թարգմանությամբ) և դեկտեմբերի 1-ին (ֆրանսերեն բնագրով), Ուջան գյուղում (Շիրակի մարզ) նոյեմբերի 28-ին և Գյումրիում` նոյեմբերի 30-ին: