Թուրք-քրդական բախումները շարունակվում են

Քաղաքական 12:23 02/12/2009

Թուրք-քրդական բախումները շարունակվում են

Թուրքական լրատվամիջոցներն արդեն երրորդ օրն է ահազանգում են քուրդ ցուցարարների ու ոստիկանների միջև բախումների մասին: «Սի Էն Էն թուրք»-ի (CnnTurk) տեղեկացմամբ` այս անգամ ընդհարումները տեղի են ունեցել Թուրքիայի Աղրը գավառում, որտեղ մի խումբ ցուցարարներ ՔԲԿ-ի (Քրդական բանվորական կուսակցություն) հիմնադրման 35 ամյակի կապակցությամբ փողոցային չարտոնված երթի են դուրս եկել և խոչընդոտել հասարակական կարգի պահպանմանը:

Հնչեցնելով քուրդ գրոհայինների զինված պայքարը գովերգող կոչեր` ցուցարարները քարերով ու բենզինով շշալցված տարաներով հարձակվել են հանդիպակաց առևտրի կենտրոնների վրա: Ոստիկանական ուժերը ցուցարարներին ցրելու համար ստիպված են եղել արցունքաբեր գազ կիրառել: Յոթ մարդ էլ ձերբակալվել է:

Այդ շրջանի անվտանգության ծառայութան պետ Նաջի Քուրուն լրագրողներին հայտնել է, որ իրավիճակն այժմ վերահսկելի է, աշխատանքներ են տարվում անկարգություն հրահրողներին ու կազմակերպողներին ձերբակալելու ուղղությամբ: Անձնակազմն էլ հերթապահում է խստացված ռեժիմով, քանի որ իրավիճակը պայթյունավտանգ է:

Տեղեկացնենք, որ ՔԲԿ-ը հիմնադրվել է 1974 թվականին` որպես մարքսիզմ ու լենինիզմ դավանող ապստամբական խմբավորում` նպատակ ունենալով Թուրքիայի հարավ-արևելյան հատվածում ստեղծել անկախ Քուրդիստան: 1990-ականներին ՔԲԿ-ը քաղաքային պարտիզանական պատերազմ էր հայտարարել թուրքական իշխանություններին. պայթեցնում էին հյուրանոցներ, առևանգում զբոսաշրջիկներին` ձգտելով խոչընդոտել թուրքական բիզնեսի զարգացմանը Թուրքիայում: 1998-ին Սիրիան թուրքական իշխանություններին հանձնեց ՔԲԿ-ի առաջնորդ Աբդուլլահ Օջալանին, որն այժմ գտնվում է ցմահ բանտարկության մեջ:

Նշենք նաև, որ «ՔԲԿ»-ը Միացյալյալ Նահանգների, Եվրամիության և Թուրքիայի կողմից ճանաչված է որպես ահաբեկչական կազմակերպություն:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: