Ձեր վստահելի աղբյուրը

«Եթե Ժիրայր Սեֆիլյանի երեխան ՀՀ-ում ծնված չլիներ, ապա նրան վաղուց էին հանրապետությունից վտարել. օրենսդրությունը այժմ դա արգելում է»,-այսօր հրավիրված մամլո ասուլիսի ժամանակ հայտարարեց «Ժիրայր Սեֆիլյանի քաղաքացիության իրավունքի պաշտպանության կոմիտեի» համակարգող Աղավնի Սահակյանը:

Ասուլիսին մասնակցում էին նաև «Ժիրայր Սեֆիլյանի քաղաքացիության իրավունքի պաշտպանության կոմիտեի» անդամ Գրիզելդա Ղազարյանը և փաստաբան Մուշեղ Շուշանյանը:

Բանախոսները ներկայացրին Ժիրայր Սեֆիլյանի քաղաքացիություն ստանալու հարցի շուրջ ստեղծված իրավիճակը և, մասնավորբար, վերջին զարգացումները, երբ կոմիտեի համակարգողի դիմումին մի քանի ամիս ձգձգումներից հետո բացասաբար է պատասխանել նաև ՀՀ Մարդու իրավունքների պաշտպան Արմեն Հարությունյանը:


Ա. Սահակյանը ասուլիսի սկզբում Յիրայր Սեֆիլյանի քաղաքացիություն ստանալու հարցը համեմատեց հայոց հարցի հետ, նկատելով, որ իրենք այնուամենայիվ, մինչև հաղթանակ պայքարելու են:


Նրանց խոսքերով, օրենք դիմել են ոչ միայն Մարդու իրավունքների պաշտպանին, այլև «Հայաստան համահայկական հիմնադրամ», որպեսզի նրանց կողմից աջակցություն ստանան:


Panorama.am-ի այն հարցին, թե ինչպե՞ս են պատկերացնում այս կառույցի կողմից հիշյալ խնդրին աջակցությունը, Գրիզելդա Ղազարյանը ասաց,թե, քանի որ իրավական ճանապարհով հարցին լուծում չի տրվում, իրենք փորձում են բարոյական ճանապարհով այն լուծել:


Սկսած 2004թ.-ից Լիբանանի քաղաքացի, ազգությամբ հայ Ժիրայր Սեֆիլյանը 3 անգամ դիմել է ՀՀ նախագահին քաղաքացիություն ստանալու համար և 3 անգամներն էլ մերժվել է:


Մ. Շուշանյանի խոսքերով, մերժման մասին միայն հայտնի էր, որ Ազգային անվտանգության ծառայությունը դա ներկայացնույմ է որպես պետական գաղտնիք:

Միայն մարդու իրավունքների պաշտպանի ինստիտուտին դիմելուց հետո, ինչպես նա հայտնեց, իրենք հասկացան, որ ԱԱԾ-ն մերժում է այն պատճառով, որ Ժ. Սեֆիլյանը իշխանությունը բռնի կերպով գրավելու կոչեր է արել, ինչպես նաև ապօրինի զենք է պահել:


Հիշեցնենք, որ 2009թ.-ի ապրիլի 28-ին մերժվել է ՀՀ Ոստիկանության Անձնագրային և վիզաների վարչության կողմից նաև Ժիրայր Սեֆիլյանի մեկ տարվա կացության կարգավիճակ ստանալու վերաբերյալ դիմումը:

Ի՞նչպես են շարունակելու իրենց պայքարը կոմիտեում, եթե նախատեսվող քաղաքացիություն ստանալու վերաբերյալ ևս մի դիմում նույն ճակատագրին արժանանա հարցին, փաստաբան Մուշեղ Շուշանյանը հայտնեց, որ իրենք դատական կարգով կլուծեն հարցը: