Ձեր վստահելի աղբյուրը

Այսօր Տերյան-Աբովյան փողոցների միջև գտնվող զբոսայգում տեղի ունեցավ  ականավոր գիտնական, ՀՀ ԳԱԱ պատվավոր նախագահ, ՀՀ ազգային հերոս, աստղաֆիզիկոս Վիկտոր Համբարձումյանի հուշարձանի բացման արարողությունը, որին ներկա էր ՀՀ նախագահ Սերժ Սարգսյանը, ՀՀ Պաշտպանության նախարար Սերյան Օհանյանը, ՀՀ սփյուռքի նախարար Հրանուշ Հակոբյանը, Երևանի քաղաքապետ Գագիկ Բեգլարյանը:

Վիկտոր Համբարձումյանի բրոնզե արձանի ունի 3 մ 20 սմ բարձրություն: Արձանի հեղինակը Տարիել Հակոբյանն է, իսկ ճարտարապետը`Հայկ Սարգսյանը:

Արձանի բացումից հետո Տերյան-Աբովյան փողոցների միջև գտնվող զբոսայգին անվանվեց Վիկտոր Համբարձումյանի անվան այգի:

Արարատյան հայրապետական թեմի առաջնորդ Նավասարդ Կճոյանը օծեց արձանը:

ԳԱԱ նախագահ Ռադիկ Մարտիրոսյանն իր բացման խոսքում նշեց, որ արձանի բացումով ավարտվում է Վիկտոր Համբարձումյանի 100-ամյակին նվիրված միջոցառումների ցանկը:

«Կառավարական անձնաժողովը իրականացրել է միջացառումների մի ծրագիր, որի նպատակն էր ամբողջ աշխարհին և մեր ժողովրդին ներկայացնել Վիկտոր Համբարձումյանին` որպես խոշոր գիտնականի, մեծ հայրենասերի, որը մեծ ավանդ է բերել քաղաքակրթությանը»,- ասաց Ռ. Մարտիրոսյանը:

Նա նշեց, որ հոբելյանի շրջանակներում կազմակերպվել են տարբեր գիտաժողովներ Մոսկվայում, Սանկտ-Պետերբուրգում, Մինսկում, Փարիզում, իսկ 2008 թիվը ՅՈՒՆԵՍԿՈ-ի կողմից հայտարարվել էր Համբարձումյանական տարի:

Ըստ նրա, միջոցառումների շնորհիվ ներկայացվեցին հայկական գիտության նվաճումները և ձեքբերումները: ԳԱԱ նախագահը նշեց, որ վերոնշյալ այգում է գտնվում հայ մեծ ճարտարապետ Ալեքսանդր Թամանյանի կողմից կառուցված աստղադիտարանը, որտեղ 1943 թվականին Հայաստան վերադարձած Վիկտոր Համբարձումյանը սկսել էր իր աշխատանքը: Նա նաև հույս հայտնեց, որ այս պուրակը և արձանը կդառնան գիտության խորհրդանիշ և սրբավայր:

Արձանի հեղինակ Տարիել Հակոբյանը նշեց, որ արձանը քանդակվել է հայ դասական ռեալիստական արվեստի ոճով:

«Արձանը բրոնզյա է, քանի որ իր գունային աշխարհով բազմերանգ բրոնզը ներդաշնակ է և միջավայրին, և այս գեղեցիկ պուրակին, և Թամանյանի կերտած աստղադիտարանին»,- հավելեց նա:

Տարիել Հակոբյանը նշեց, որ սա իր հեղանակած Վիկտոր Համբարձումյանի 4-րդ արձանն է, առաջին արձանը տեղադրվել է ԵՊՀ-ում, երկրորդ արձանը տեղադրվել Բյուրականի աստղադիտարանում, իսկ երրորդը ` Թեհրանի նախագահի նստավայրին հարակից աշխարհի խոշորագույն գիտնականներին նվիրված պարտեզում: