Ձեր վստահելի աղբյուրը

20 տարի առաջ Հունվարի 13-19-ին Ադրբեջանի մայրաքաղաքում իրականացվեցին ջարդեր, որոնց արդյունքում Բաքվի 50 հազարանոց հայ բնակչությունը սպանվեց կամ էլ տեղահանվեց: Այս սոսկալի իրադարձությունների արդյունքում փախստական դարձած մարդկանց ճակատագրով և իրավունքների վերականգնման հարցերով զբաղվում են մի շարք հասարակական կազմակերպություններ:

Panorama.am-ի թղթակցի հետ զրույցում «Վերադարձ Հայք» հասարակական կազմակերպության նախագահ Ռոբերտ Մելիք-Փաշաևը նկատեց, որ իրենք իրավունքների վերականգնման իմաստով ցանկանում են փոխհատուցում:

«Ոչ ոք ներկայումս ցանկություն չունի վերադառնալու Բաքու: Մենք ցանկանում ենք փոխհատուցում, որպեսզի մեր թողած շարժական ու անշարժ գույքի փոխարեն մեզ փոխհատուցեն` Ղարաբաղում բնակարաններ տրամադրելով.Բաքվի հայերի մեծ մասը հենց Ղարաբաղի ծնունդներ են»,-մասնավորեց Ռ. Մելիք-Փաշաևը:

Ինչ վերաբերում է Ադրբեջանի կողմից անընդհատ բարձրաձայնվող փախստականների հարցին, ապա` «նրանք այն ժամանակ վերադարձան և 73 մլն դոլարի փոխհատուցում ստացան մեր իշխանություններից: Իսկ Բաքվից բռնագաղթածների փոխհատուցման հարցը մինչ օրս մնում է առկախ: Ոչ ոք պարզապես չի զբաղվում այս հարցով»:

«Օրինակ Ադրբեջանում այս հարցով պետական մակարդակով են զբաղվում, պետությունն աջակցում է հասարակական կառույցներին` զբաղվելու փախստականների խնդիրներով: Պետք է պայքարը սկսել միջազգային դատական ատյաններից: Ի դեպ ադրբեջանցիները ներկայումս այսօրինակ գործընթացներ են սկսել»,-ասաց Ռ. Մելիք-Փաշաևը :

Հարկավոր է մեծ աշխատանք տանել, օրինակ դժվար է հաշվարկել, թե որքան է կազմում փոխհատուցման չափը, սակայն պարզ է, որ բռնազավթված են 100.000-ավոր տներ:

«Ի դեպ խոսում ենք 1915թ.-ի ցեղասպանությունից, բայց չենք պահանջում վեր հանել Բաքվի դեպքերը, որոնք փաստորեն ցեղասպանության շարունակությունն են: Այն ժամանակվա թերթերը գրում էին, թե օրական որքան մարդ են այստեղ կամ այնտեղ սպանել, սակայն մինչ օրս հայտնի չէ, թե կոնկրետ քանի՞ մարդ զոհվեց Բաքվի ցեղասպանության ժամանակ: Խորհրդային արխիվները փակ են այս թեմայի համար: Ո՞ւմից են փակել և ինչո՞ւ են թաքցնում այս տեղեկատվությունը»,-ասաց «Վերադարձ Հայք» հասարակական կազմակերպության նախագահը: