Ձեր վստահելի աղբյուրը

Ադրբեջանական քարոզչությունն արդեն մի քանի օր է` փորձում է հնարավորինս մեծ քարոզչական օգուտներ քաղել Հայաստանից քրեական տարրի` Նախիջևանի մարզ կատարած փախուստի փաստից: Այս թեմայի շուրջ սեփական ստեղծագործական հնարավորությունները սպառած լրատվամիջոցներն արդեն դիմել են հանրային գործիչների օգնությանն ու փորձում են հասկանալ, թե «ինչն է դրդել Հայաստանի քաղաքացուն փախուստի դիմել հենց թշնամի երկիր»:

Բնականաբար, հարցին պատասխանողները հանդես են գալիս բազմիցս շրջանառված մտացածին պնդումներով, թե Հայաստանում սոված են, երկրից դուրս գալու այլ ելք չկա, և այլն: Սակայն «1նյուզ.ազ» կայքում զետեղված պատասխաններից մեկը մեր ուշադրությունը գրավեց միանգամայն այլ պատճառով:

Պատասխանի հեղինաը նշված է որպես «Էխո» թերթի աշխատակից Նուրանի: Եվ ահա, հիշյալ Նուրանին, պատասխանելով հարցին, ասում է. «Իրականում, խոսքը դասական սադրանքի մասին է: Իմ կարծիքով, հայերը պարզապես փորձում են «ջղայնացնել» Ադրբեջանին, մեր երկրին սադրել պատասխան գործողությունների և հետագայում դրանից իրենց հարմար «նյութ» պատրաստել ու «փիար» անել, թե ադրբեջանցիներն ինչ վատն են: Առավել ևս, որ այդ ամենը տեղի է ունենում այն օրերին, երբ Հայաստանն աղմուկ է բարձրացրել Բաքվում հայերի ջարդի հերթական տարելիցի շուրջ (իհարկե, ոչ մի խոսք չասելով, որ այդ ջարդերը կազմակերպվել ու ուղղորդվել են ՊԱԿ-ի (КГБ) կողմից` «օրենքով գողերի» աջակցությամբ)»:

Սա բառացի մեջբերում է «1նյուզ.ազ»-ի հրապարակումից: Ընթերցողին խորհուրդ ենք տալիս ուշադրություն դարձնել մեջբերման այն հատվածին, որտեղ, ըստ էության, հաստատվում է Բաքվում հայերին կազմակերպված կոտորելու փաստը, բայց կազմակերպչական աշխատանքների պատասխանատվությունը թողնվում է ՊԱԿ-ի ու «օրենքով գողերի» վրա: Փաստորեն «1նյուզ.ազ»-ը հաստատում է, որ հայերը կոտորվել են ու բռնի տեղահանվել տեղի իշխանությունների կողմից կազմակերպված ու ուղղորդված ջարդերի արդյունքում:

Հիշեցնենք, որ թե' այսօր, թե' 1990 թվականին Ադրբեջանում իշխող հիմնական ինստիտուտները այդ երկուսն են` անվտանգության ծառայություններն ու ոչ ֆորմալ քրեական խմբավորումները: