Ձեր վստահելի աղբյուրը

20 տարի առաջ հունվարի 19-ին Բաքվի հայկական ջարդերին, որոնք սկսվել էին դեռ հունվարի 13-ին, վերջ տալու նպատակով խորհրդային զորքերը մեծ ուշացումով հասան Ադրբեջանի մայրաքաղաք:

Հայերի ջարդերը կազմակերպած ադրբեջանցիները (հիմնականում`Բաքվի ժողովրդական ճակատ) , որոնք զոհվեցին խորհրդային զորքերի գործողությունների արդյունքում, սրբացվեցին` թաղվելով այսպես կոչված Շեյիդների գերեզմանոցում:

Այսօր` Բաքվում հայկակական ջարդերի և դրան հաջորդող դեպքերի 20-ամյակի հետ կապված ասուլիսի ժամանակ, հայտնեց «Մեր տունը Հայաստանն է» ՀԿ-ի ղեկավար Նիկոլայ Բաբաջանյանը:

Ասուլիսին մասնակցում էին նաև տեղեկատվական անվտանգության մասնագետներ Տիգրան Քոչարյանը և Սամվել Մարտիրոսյանը:

Ըստ նրանց, ներկայումս Բաքուն դեպքերն այլ լույսի ներքո է ներկայացնում ողջ միջազգային հանրությանը:

Ինչպես նկատեց Ն. Բաբաջանյանը, այս գործողությունները` խորհրդային զորքի ներխուժումը Բաքու, ստիպողական քայլեր էին. արդեն Եվրոպական միությունն էր բարձրաձայնում այդ մասին:


Ներկայումս ադրբեջանական քարոզչական մեքենան, ըստ նրա, հիմնվելով սուտ տեղեկատվության վրա , նշում է, որ այս բախմանը զոհ են գնացել 100-ից ավելի «շեյիդներ», թեև նրանք իրականում 76-ն էին: Բանն այն է, եր ինքնասպանություն գործած մի կին, խորը հոգեբանական ապրումներից կաթվածահար մի մարդ և այլն, ներկայացվում են որպես խորհրդային զորքերի կողմից զոհվածներ:

Տիգրան Քոչարյանը նշեց, որ ադրբեջական քաղաքականությունը մշակել է մի բանաձև, ըստ որի իրենց գործած վայրագությունները ներկայացվում են որպես իրենց դեմ գործված վայրագություններ հայերի կողմից:


Տեղեկատվական անվտանգության մեկ այլ մասնագետ Սամվել Մարտիրոսյանը հավելեց, որ ադրբեջական քարոզչամեքենան այժմ փորձում է ներկայացնել Բաքվի ջարդերը յուրահատուկ ձևով:

«Իբր իրականացվել է դավադրություն, կազմակերպվել են հայկական ջարդեր, որի ժամանակ ադրբեջանցիները փրկել են հայերին»:

Բանախոսը հարց բարձրացրեց` ո՞վ էր կոտորում հայերին: «Ըստ ադրբեջանական քարոզչության հենց հայերն են եղել կազմակերպիչները և իրագործողները»:
Սումգայիթի ջարդերի` որպես հայերի իսկ կազմակերպած գործողությունների թեզը, ըստ Սամվել Մարտիրոսյանի, հորինել են ադրբեջանցիները` հիմնվելով այն փաստի վրա, որ կազմակերպիչների մեջ եղել է Գրիգորյան ազգանունով մի անձնավորություն: Հետագայում պարզվել է, որ նա ընդամենը կրել է իր խորթ հոր ազգանունը և փաստորեն իրավաբանորեն է հայի ազգանուն է կրել:

Տիգրան Քոչարյանն էլ նկատեց, որ ակնհայտ ստերն այսօր արդեն բացահայտվում են հայկական կողմից :

Սկսվել է այնպիսի մի գործընթաց, որ ադրբեջանական որոշ կայքէջերի չեն վստահում ընդհանրապես, ինչպես օրինակ 1news.az-ին:

«Ներկայումս հայկական հակազդեցությունը համացանցում չի ուշանում, նրանց կեղծ վավերագրական ֆիլմերը դուրս են բերվում համացանցից, (Խոջալուի վերաբերյալ վերջին տարիներին 4 ֆիլմեր են նկարահանվել) փոխարենը մենք նկարում ենք պատասխան վավերագրական ֆիլմաշար` «Բաքու 1990` հունվար. սովորական ցեղասպանություն»-ը, որն արդեն հայտնվել է համացանցում»:

Տ. Քոչարյանը նշեց նաև, որ թեև գովելի է, որ պետության առաջին դեմքերն են արդեն զբաղվում այս խնդրով, սակայն անընդունելի էր հունվարի 13-ին` ջարդերի սկսման 20-րդ տարելիցի օրը Մարզահամերգային համալիրում կազմակերպել հրավառություն` երգիչ Արմենչիկի համերգի կապակցությամբ: