Ձեր վստահելի աղբյուրը

Հանրապետության նախագահի վերահսկողական ծառայության բացահայտած խոշոր խախտումները Բարձրագույն որակավորման հանձնաժողովի գործունեության վերաբերյալ հիմք չեն տվել այդ կառույցի ղեկավարությանը վերանայելու նախկինում ընդունված որոշումները: Խախտումների բացահայտման ու հրապարակման արդյունքում ոչ ոք աշխատանքից չի ազատվել, որևէ մեկից կոչում կամ գիտական աստիճան հետ չի վերցվել:

«Առանձին դեպքեր, որոնք հիմք կտային մեզ վերանայելու նախկինում ընդունված որոշումները, չկան»,-այսօր ի պատասխան Panorama.am-ի հարցման լրագրողների հետ հանդիպմանն ասաց ԲՈՀ-ի նախագահ Արմեն Թռչունյանը: Նա ավելացրեց, որ ծառայության բացահայտած խախտումները հիմնականում իրավական բնույթի են, և պետք է օրենսդրական փոփոխություններ իրականացվեն:

Հիշեցնենք, որ ըստ վերոնշյալ ծառայության հրապարակած տվյալների, ԲՈՀ-ի կողմից 2009-ին կիրառության մեջ է դրվել մի իրավական ակտ, որը գրանցված չի եղել արդարադատության նախարարությունում: Այդ իրավական ակտը հակասում է կառավարության որոշմանը, դրանք տարբեր չափանիշներ են ամրագրում, և արդյունքում երկակի չափանիշներ են կիրառվել:

Հանձնաժողովի նախագահին հիշեցրինք, որ խախտումների թվում կային նաև դեպքեր, երբ գիտական կոչում ու աստիճան է շնորհվել բազմաթիվ խախտումներով, օրինակ եղել են ատենախոսություններ, որոնց բովանդակությունը չի համապատասխանել թեմային, ատենախոսության ծավալը սահմանվածից քիչ է, տողերի քանակը՝ պակաս: Ավելին, վերահսկողական ծառայությունը բացահայտել էր, որ ԲՈՀ-ում գրագողություն կատարածին էլ են գիտական աստիճան տվել:

Սրան ի պատասխան Թռչունյանն արձագանքեց, թե գիտական աստիճաների վերանայում և զրկում գիտական աստիճանաշնորհման կանոնակարգով ԲՈՀ-ի գործառույթներով նախատեսված չէ: Ինչ վերաբերում է հարցին, թե բովանդակությունը թեմային համապատասխան չի եղել, ապա ըստ Թռչունյանի, մասնագիտական խորհուրդը առարկություններ է ներկայացրել:

 «Ես դրա համար ասացի, որ շատ կարևոր են մասնագիտական մոտեցումները, բովանդակային հարցերը վարչական աշխատողների լուծման հարցեր չեն»,-ասաց հանձնաժողովի դոկտոր նախագահը, նշելով, որ ուղիներ են որոնվում բացառելու խախտումները:



Նախորդող հրապարակում՝Հաջորդ թիրախը Թռչունյանի ղեկավարած ԲՈՀ-ն է