Ռազմիկ Ստեփանյան. «Ադրբեջանի հավաքականը, ըստ մեր տեղեկությունների, կժամանի Երևան»
Այսօր «Անի» հյուրանոցում զանգվածային լրատվամիջոցների ներկայացուցիչների հետ հանդիպեցին Հայաստանի ազգային օլիմպիական կոմիտեի փոխնախագահ, «Հայաստան» մարզական միության նախագահ Ռազմիկ Ստեփանյանը և ըմբշամարտի ֆեդերացիայի փոխնախագահ Հրանտ Ենոքյանը: Նրանք ներկայացրեցին փետրվարի երկրորդ տասնօրյակում Երևանի Կարեն Դեմիրճյանի անվան մարզահամերգային համալիրում կայանալիք ըմբշամարտի աշխարհի գավաթի խաղարկության նախապատրաստական աշխատանքները, անդրադարձան նաև Ադրբեջանի հավաքականի` երևանյան մրցաշարին մասնակցության հետ կապված խնդրին:
«Աշխարհի գավաթի խաղարկության մասնակիցների ընտրությունը կատարվում է միջազգային ֆեդերացիայի կողմից` հաշվի առնելով նախորդ աշխարհի առաջնության արդյունքները: Ադրբեջանը, որպես զարգացած ըմբշամարտ ունեցող երկիր, իրավունք է ստացել` մասնակցելու Երևանում կայանալիք առաջնությանը: Ըստ մեր ունեցած տեղեկությունների` ադրբեջանցիները պետք է ժամանեն Հայաստան: Ըստ երևույթին` նրանք հայտը կներկայացնեն միջազգային ֆեդերացիային, որը, իր հերթին, մեզ կփոխանցի կոնկրետ տվյալները: Սակայն առայսօր միջազգային ֆեդերացիան որևէ պաշտոնական հայտարարություն չի կատարել, հայտ չի ներկայացրել: Վերջնաժամկետը մինչև հունվարի վերջն է, և առաջիկա մեկ-երկու օրվա ընթացքում մենք, կարծում եմ, որոշակի պատասխան կունենանք»,- նշեց Ռազմիկ Ստեփանյանը:
Կապված նույն խնդրի հետ` ըմբշամարտի ֆեդերացիայի փոխնախագահ Հրանտ Ենոքյանը նախ բացատրեց, որ Հայաստանը չի կարող անմիջապես Ադրբեջանից որևէ տեղեկություն կամ հայտ ստանալ, որովհետև երկու երկրների ֆեդերացիաները որևէ կապ չունեն:
«Ըստ գործող կարգի` նամակով դիմել ենք միջազգային ֆեդերացիային և խնդրել ենք տեղեկացնել մեզ` արդյոք Ադրբեջանի հավաքականը մասնակցելո՞ւ է առաջնությանը, եթե այո, ինչպիսի կազմով, որպեսզի լուծենք մասնակցության հետ կապված խնդիրները,- նշեց Հրանտ Ենոքյանը:- Միջազգային ֆեդերացիայից դեռ ոչ մի տեղեկություն չունենք, որ Ադրբեջանի հավաքականը չի ժամանելու Երևան: Եթե, այնուամենայնիվ, ադրբեջանցիները որոշեն չմասնակցել, ըմբշամարտի միջազգային ֆեդերացիայի կողմից կընտրվի ևս մեկ թիմ, որը տեղ է զբաղեցնում վարկանշային սանդղակի լավագույն տասնյակում: Այլ կերպ ասած` ընտրությունը կկատարվի Դանիայի, Շվեդիայի և Ուզբեկստանի հավաքականների միջև»:
2010 թ. ապրիլի վերջին Բաքվում մեկնարկելու է Եվրոպայի ըմբշամարտի առաջնությունը: Եթե Ադրբեջանի ընտրանին հրաժարվի մասնակցել աշխարհի գավաթի խաղարկությանը, հնարավո՞ր է, որ մեր թիմը, իր հերթին, չուզենա մասնակցել մայրցամաքային այդ մրցաշարին:
«Մենք մասնակցել ենք 2007 թ. Բաքվում կայացած աշխարհի առաջնությանը: Այն ժամանակ Բաքու էին մեկնել Հայաստանի ինչպես հունահռոմեական, այնպես էլ ազատ ոճի ըմբշամարտի հավաքականները` պրն Ռազմիկ Ստեփանյանի գլխավորությամբ: Մեր օրակարգում նման հարց չկա, որովհետև աշխարհի գավաթի խաղարկությունից հետո դեռ երկու ամիս ժամանակ կա, մինչև կմեկնարկի Եվրոպայի առաջնությունը: Հայաստանի հունահռոմեական և ազատ ոճերի ըմբշամարտի հավաքականները, համաձայն օրացուցային պլանի, նախապատրաստվում են Ադրբեջանում տեղի ունենալիք Եվրոպայի առաջնությանը, անկախ նրանից` Ադրբեջանի ընտրանին ժամանելո՞ւ է Երևան, թե ոչ»,- հայտարարեց Հրանտ Ենոքյանը:
Լրահոս
Տեսանյութեր
ՍԴ-ն այդ խայտառակ որոշմամբ ուղերձ է հղում Ադրբեջանին, որ անհանգստանալու բան չկա. Վարդան Պողոսյան
