Ձեր վստահելի աղբյուրը

Այսօր հունվարի 28-ն է, Հայոց Բանակի կազմավորման 18-րդ տարեդարձը: Տարեդարձ, որ պարտավորեցնում է բոլորիս հետադարձ հայացք գցել անցյալին և պատվախնդրորեն ու հաստատակամ քայլերով շարժվել առաջ: Այսօր տոնին նվիրված միջոցառումներ կլինեն ԶՈւ և ՊԲ ստորաբաժանումներում կանցկացվեն հանդիսավոր միջոցառումներ:

Այսօր առավոտյան նախատեսված է այցելություն «Եռաբլուր» զինվորական պանթեոն ՀՀ Նախագահի, կառավարության անդամներ, զինված ուժերի բարձրագույն սպայակազմ և ազատամարտիկների մասնակցությամբ: Սպենդիարյանի անվան օպերայի և բալետի պետական ակադեմիական թատրոնում կանցկացվի տոնական համերգ, հանրապետության նախագահը պարգևներ կհանձնի ոլորտի ներկայացուցիչներին:


«Տասնութ տարի առաջ, երբ ստեղծվում էր պաշտպանական գերատեսչությունը, և կազմավորվում էին բանակային առաջին կանոնավոր ստորաբաժանումները, մեզանից ոչ ոք` անգամ առավել լավատեսները, պատկերացնել չէին կարող, որ այսօր կունենանք այսպիսի հզոր և մարտունակ բանակային կառույց: Չէինք պատկերացնում, քանզի երկու տասնամյակ առաջ պատերազմ էր, ծանր ու դաժան պատերազմ, որում պետք է վճռվեր հայրենի երկրի ճակատագիրը»,-նախօրեին գնահատելով բանակի այսօրվա վիճակը` ասել է պաշտպանության նախարար Սեյրան Օհանյանը:


Նախարարն ընդգծել է, որ պետականության կառուցմանը զուգընթաց, անմիջապես ռազմական պայքարի բովում կազմավորվում էր հայոց ազգային բանակը: Եվ հենց նրանք՝ բանակի նորակազմ կանոնավոր զորամասերը, կռեցին վերջնական հաղթանակը Արցախյան ազատամարտում:

Իր կայացման ճանապարհին հայոց բանակը անցել է մի քանի առանցքային փուլ: Առաջին փուլում հրատապ խնդիրը Արցախի և Հայաստանի բնակչության ֆիզիկական անվտանգության ապահովումն էր կամավորական ջոկատների միջոցով: Ինքնաբուխ, սակայն գիտակցված անհրաժեշտության մղումով ստեղծվեցին առաջին ինքնապաշտպանական ջոկատները, որոնց ուսերին ծանրացավ երկրի վտանգված սահմանների, խաղաղ բնակչության անվտանգության ապահովման պատասխանատվությունը: Վերստին հառնեց հայ քաջարի ֆիդայու՝ ազատարարի և պաշտպանի փառահեղ կերպարը, մեր պայքարի առաջապահը դարձան անձնազոհ ու հայրենանվեր ազատամարտիկները, որոնցից շատերը իրենց կյանքը նվիրաբերեցին Արցախյան համազգային պայքարին:

Հաջորդ փուլում եռանդուն աշխատանք էր տարվում Ազգային բանակի կայացման, կանոնավոր ստորաբաժանումների ձևավորման համար: Մեր ժողովրդին հաջողվեց գրեթե անհնարինը` համատեղել երկու դժվարին խնդիրները. ծանր, բայց հաղթական պատերազմին զուգընթաց` հաջողությամբ իրականացվում էր բանակաշինության գործընթացը` կամավորական ջոկատների հիմքի վրա ձևավորում էին բանակային կանոնավոր ստորաբաժանումները, որոնք էլ հենց հաղթական ավարտին հասցրին պատերազմը:

Օհանյանն ասել է, որ Հայոց բանակը հաստատակամորեն ընթանում է կատարելագործման ճանապարհով, հուսալիորեն պաշտպանում է մեր հայրենիքի սահմանները, ունի միջազգային բարձր հեղինակություն և տարածաշրջանում իրավամբ համարվում է ամենամարտունակներից մեկը: «Այսօր հակառակորդի ռազմաքաղաքական ղեկավարության կողմից հաճախակի հնչող ռազմաշունչ հայտարարությունները մեզ ոչ թե սարսափ են ազդում, այլ զգոնության և անընդմեջ կատարելագործման են կոչում, քանզի խաղաղության պահպանման լավագույն միջոցը հակառակորդին հզոր ռազմական ուժ հակադրելն է»,-ասել է նա:


Նա կոչ է արել բանակային կյանքի նոր՝ 19-րդ տարին սկսել պարտավորության և պատասխանատվության խորը զգացումով, հստակ գիտակցելով, որ հարկ է ոչ միայն փայփայել ու պահպանել մեր ձեռքերով և համապետական, համազգային օժանդակությամբ կայացած կառույցը, այլև անընդմեջ զարգացնել ու կատարելագործել այն, միշտ պահել այն բարձրության վրա, որ ի զորու լինենք դիմագրավելու բոլոր փորձություններին և մարտահրավերներին և լիարժեքորեն ապահովելու մեր երկրի անվտանգությունը:


Նշենք, որ 1992թ. այս օրը ՀՀ առաջին նախագահ Լևոն Տեր-Պետրոսյանը ստորագրեց հայոց բանակի կազմավորման հրամանագիրը: Նորաստեղծ բանակը գլխավորեց Պաշտպանության առաջին նախարար Վազգեն Սարգսյանը, ով մեծ դեր ունեցավ կազմակերպված, ունակ և արհեստավարժ զինված ուժերի ձևավորման գործում: Նորաստեղծ բանակը գլխավորեց Պաշտպանության առաջին նախարար Վազգեն Սարգսյանը, ով մեծ դեր ունեցավ կազմակերպված, ունակ և արհեստավարժ զինված ուժերի ձևավորման գործում:


Եվ շատ նվիրյալների, այդ թվում` հայտնի վետերաններ Արկադի Տեր-Թադևոսյանի և Նորատ Տեր-Գրիգորյանի աջակցությամբ ու մասնագիտական հմտություններով մեր բանակը` մինչև լավ զարգացած և կարգապահ հաստատություն դառնալը, հաղթահարեց բազում կարևոր մարտահրավերներ:

Ընդգծենք, որ բանակային կազմավորումները գնահատելիս` արևմտյան ռազմական փորձագետներ և այլ անկախ վերլուծաբաններ ՀՀ զինված ուժերին հետևողականորեն դասում են որպես հետխորհրդային ողջ տարածագոտու ամենից արհեստավարժ, մարտունակ և պատրաստված բանակը: