Ձեր վստահելի աղբյուրը

Հայաստանում մտադիր են ստեղծել ուռուցքաբանական համալիր, որի կազմում կընդգրկվի բժշկական նպատակներով ռադիոիզոտոպների արտադրության ցիկլոտրոն: Այսօրվա նիստից հետո այս մտադրության մասին լրագրողներին հայտնեց Հայաստանի ազգային մրցունակության հիմնադրամի գործադիր տնօրեն Բեկոր Փափազյանը:

Մեկ ցիկլոտրոնի արժեքը հասնում է 11 մլն եվրոյի, ուռուցքաբանական համալիրի ստեղծումը նախնական տվյալներով գնահատվում է 30-40 մլն եվրո: Միջոցները մտադիր են ներգրավել մասնավոր ներդրողներից: Բ. Փափազյանի խոսքով, արդեն պատրաստ են ներդրումային փաթեթները, բանակցություններն էլ ավարտական փուլում են:

Փափազյանի խոսքով, այս ծրագիրը տարածաշրջանում բավականին հեռանկարային է և Հայաստանին թույլ կտա մեծացնել մրցունակությունը առողջապահության բնագավառում:

Հիշեցնենք, որ փետրվարի 13-14-ը կկայանա Հայաստանի ազգային մրցունակության հիմնադրամի հոգաբարձուների խորհրդի հերթական նիստը: Նիստը բացել է վարչապետ, հիմնադրամի հոգաբարձուների խորհրդի նախագահ Տիգրան Սարգսյանը:

Օրակարգում են քննարկումներ մրցունակության հիմնադրամի եռամյա գործունեության պլանավորման, ընթացիկ տարվա բյուջեի և ակնկալվող արդյունքների շուրջ:

Քննարկման են դրվել Կրթության և գիտության մրցունակության կենտրոնի ծրագրի իրագործելիության ուսումնասիրության արդյունքները: Ներկայացվել է Զբոսաշրջության զարգացման հայկական գործակալության` հիմնադրամի հետ միավորման գործընթացը, զբոսաշրջության խթանման ծրագիրը և հիմնադրամի համագործակցությունը ԱՄՆ միջազգային զարգացման գործակալության հետ:

Նիստին քննարկվել է նաև մրցունակության հիմնադրամի կողմից կատարված ուսումնասիրությունը Հայաստանում ուռուցքաբանության ոլորտի զարգացման մասին, ինչպես նաև կառավարության կողմից ցիկլոտրոնի ձեռքբերման որոշումը: