Ձեր վստահելի աղբյուրը

Այսօր Երևանի Կարեն Դեմիրճյանի անվան մարզահամերգային համալիրում մեկնարկեց հունահռոմեական ոճի ըմբշամարտի աշխարհի գավաթի խաղարկությունը: Մեկնարկային տուրում Հայաստանի հավաքականի մրցակիցը Սկանդինավյան երկրների հավաքականն էր, որը, հիշեցնենք, միայն վերջին պահին իրավունք ստացավ՝ ժամանելու Երևան:

Դա տեղի ունեցավ այն բանից հետո, երբ Ադրբեջանի ընտրանին հրաժարվեց ժամանել Երևան, իսկ այնուհետև ժամանակի մեջ չկարողացան տեղավորվել նաև ուզբեկները: Արդյունքում ըմբշամարտի միջազգային ֆեդերացիան որոշեց, որ հունահռոմեական ոճի աշխարհի գավաթի խաղարկությանը կմասնակցեն Նորվեգիայի, Դանիայի և Շվեդիայի մարզիկները՝ միասնական թիմով:
Հայաստանի ազգային հավաքականի կազմում առաջինն ասպարեզ մտավ մինչև 55 կգ քաշային Ռոման Ամոյանը:

 Նրա մրցակիցն Էմիլ Սանդբերգն էր: Ռոմանը վստահ անցկացրեց գոտեմարտը և հաղթեց իր մրցակցին: Հաղթանակներ տոնեցին նաև Վահան Ջուհարյանը (60 կգ), Արման Ադիկյանը (66 կգ), Արսեն Ջուլֆալակյանը (74 կգ), Դենիս Ֆորովը՝ համապատասխանաբար առավելության հասնելով Ֆրեդերիկ Բյեռեհուսի, Մաթիաս Գունտերի, Մարկ Մադսենի և Ջիմ Պետերսոնի նկատմամբ: Քանի որ մրցակիցը 96 կգ քաշային կարգում մարզիկ չներկայացրեց, թեպետ պլանավորված էր, որ գորգ դուրս կգա Նո Վրեստլերը, Հայաստանի հավաքականին ևս մեկ հաղթանակ շնորհվեց: Հաշիվը հասավ 6:0-ի՝ հօգուտ Հայաստանի հավաքականի:
120 կգ քաշային կարգում Հայաստանի ազգային թիմի ներկայացուցիչ Յուրի Պատրիկեևն իր բարձր կարգը հաստատեց Ջահան Էուրենի հետ մրցակցությունում:

Վերջնարդյունքում մեր ընտրանին տպավորիչ հաղթանակ տոնեց սկանդինավյան հավաքականի նկատմամբ՝ 7:0 հաշվով:
Նույն խմբում ընդգրկված Իրանի ընտրանին դժվարին պայքարում 4:3 հաշվով պարտության մատնեց Կուբայի թիմին:
Ավելացնենք, որ «Բ» խմբում Թուրքիայի ազգային թիմը 6:1 հաշվով առավելության հասավ Հունգարիայի թիմի նկատմամբ:

Նույնպիսի արդյունք արձանագրվեց նաև Ռուսաստան-Վրաստան խաղում: Հարկ է նշել նաև, որ ՌԴ հավաքականի կազմում մինչև 66 կգ քաշային կարգում ելույթ ունեցավ հայ ըմբշամարտիկ Սեյրան Սիմոնյանը: Նա հաղթեց Մանուչար Ցխադայային:
Հիշեցնենք, որ աշխարհի ութ ուժեղագույն հավաքականները բաժանվել են երկու ենթախմբի: «Ա» խմբում ընդգրկվել են Իրանի Իսլամական Հանրապետության, Կուբայի, Սկանդինավյան երկրների (Նորդիք) և Հայաստանի հավաքականները: «Բ» խմբում հանդես կգան Թուրքիայի, Հունգարիայի, Ռուսաստանի և Վրաստանի ընտրանիները: Վիճակահանության արդյունքների համաձայն` կազմվել է նաև հանդիպումների օրացույցը:

13.02.2010
09:30
«Ա» գորգ
Իրան-Կուբա 4:3
Նորդիք-Հայաստան 0:7
«Բ» գորգ
Թուրքիա-Հունգարիա 6:1
Ռուսաստան-Վրաստան 6:1
15:30- բացման հանդիսավոր արարողություն
16:30
«Ա» գորգ
Իրան-Նորդիք
Կուբա-Հայաստան
«Բ» գորգ
Թուրքիա-Ռուսաստան
Հունգարիա-Վրաստան

14.02.2010
10:00
«Ա» գորգ
Իրան-Հայաստան
Կուբա-Նորդիք
«Բ» գորգ
Թուրքիա-Վրաստան
Հունգարիա-Ռուսաստան
Հանդիպում 5/6 տեղերի համար
17:45
«Ա» գորգ
Հանդիպում 3/4 տեղերի համար
Եզրափակիչ
Պարգևատրման հանդիսավոր արարողություն