Ձեր վստահելի աղբյուրը

Ազգային ժողովում խորհրդարանականները սկսել են քննարկել «Միջազգային պայմանագրերի մասին օրենքում փոփոխություններ կատարելու մասին օրենքի» նախագիծը, որը ներկայացնում է ՀՀ արտաքին գործերի նախարար Էդվարդ Նալբանդյանը:

Օրենքում առաջարկվող փոփոխությունները ենթադրում են միջազգային պայմանագրի կասեցում և դադարեցում: Պայմանագրից դուրս գալու նախաձեռնություն կարող է հայտնել ՀՀ նախագահը, վարչապետը, արտգործնախարարը կամ իրավասու որևէ գերատեսչություն, որը ներկայացնում է հիմնավորումներ ԱԳՆ-ին: Իսկ արտաքին քաղաքական գերատեսչության պատասխանատուն էլ տասնօրյա ժամկետում այդ հիմնավորումները ներկայացնում է երկրի ղեկավարին, որն էլ կայացնում է որոշում:


Ազգային ժողովի «Ժառանգություն» խմբակցության անդամ Արմեն Մարտիրոսյանը հիշեց նախագահ Սարգսյանի հայտարարությունը, թե եթե հայ-թուրքական գործընթացը ձգձգվի, ապա Հայաստանը կարող է հիմնվելով կատարելիք փոփոխությունների վրա`  դուրս գալ գործընթացից ու հարցրեց. «Այդ շրջանակներո՞ւմ է տեղավորվում այս օրինագիծը»:

«Հայաստանի նախագահը հայտարարություն է արել, և կարծում եմ, դրան ավելացնելու որևէ բան ես չունեմ», -ի պատասխան նկատեց արտգործնախարարը: Սակայն վերջինիս պատասխանը, ըստ երևույթին, չգոհացրեց պատգամավորին, և նա պնդեց. «Եթե դժվար չէ` այո՞, թե՞ ոչ»:

«Իհարկե, բնականաբար: Ինչպես գիտեք, պայմանագրերը կասեցնելու և դադարեցնելու վերաբերյալ կարող են նախաձեռնությամբ հանդես գալ նախագահը, վարչապետը, արտաքին գործերի նախարարը և համապատասխան գերատեսչություններ: Բնականաբար, եթե անհրաժեշտություն լինի, սա էլ միջազգային պայամանգիր է, ուրեմն համապատասխան քայլեր կձեռնարկվեն», -պատասխանեց նախարար Նալբանդյանը:

Նախորդող նորություն` Անհետաձգելի համարվող օրինագիծը մշտական հանձնաժողովում դրական եզրակացություն ստացավ. «Ժառանգությունը» դեմ էր