Ձեր վստահելի աղբյուրը

Xocali.net կայքի շնորհանդեսից հետո Խոջալուի դեպքերի քարոզչությամբ զբաղվող ադրբեջանցի մասնագետների ու Ալիևների ընտանիքի միջև խնդիրներ են առաջացել: Քարոզիչները ֆորումներում դրանից հետո լռում են, լրատվական կայքերի միջոցով վիրավորանքներ հնչեցնում Խոջալուի դեպքերի մասին մեկնաբանություններ տված հայ պաշտոնյայի հասցեին, նույն կայքերի միջոցով կոչեր անում կոտրել էջը: Այսօր լրագրողների հետ հանդիպմանը նման տեսակետ հայտնեց «Այլատյացության կանխարգելման նախաձեռնության» անդամ Սամվել Մարտիրոսյանը, ով հետևել է ադրբեջանական կողմի արձագանքին: Նա ադրբեջանցիներին հիշեցրեց, որ կայք կոտրելը քրեորեն պատժելի հանցագործություն է, բացի այդ էլ Xocali.net-ը դժվար է կոտրել:
 
«Կայքը բավականին մեծ աժիոտաժ առաջացրեց Ադրբեջանում, նրանց նյարդային համակարգի վրա այն լուրջ ազդեց»,-ասաց Ս. Մարտիրոսյանը` նշելով, որ Ադրբեջանը պետական մակարդակով արդեն այդ կեղծ լուսանկարների հիման վրա ցուցապաստառներ, ֆիլմեր էր պատրաստել, որպեսզի ցույցերի ժամանակ օգտագործվեին կամ ցուցադրվեին, սակայն հայկական կողմը փետրվարի 24-ին կանխել է նրանց գործողությունները:
 

Ադրբեջանցիները  այդ պաստառներով ցույց անցկացնել  կարողացել են միայն  Ստոքհոլմում: 
 

«Նրանց մոտ խնդիր առաջացավ այդ նյութերը փոխելու: Իսկ եթե ավելի լայնաժամկետ նայենք, ապա 15 տարիների ընթացքում նրանք տպագրել են ահռելի քանակությամբ գրքեր, ֆիլմեր են նկարել, որտեղ այդ կեղծ նյութերն են օգտագործվել: Հիմա նրանց մոտ խնդիր է առաջացել, քանի որ այն քարոզիչները, որոնք զբաղվում էին Խոջալուի դեպքերով, մեծ վնաս են հասցրել Ալիևների ընտանիքն, որովհետև այդ ընտանիքն է զբաղվում քարոզչության ֆինանսավորմամբ»,-ասաց հայ փորձագետը` հիշեցնելով, որ խեղաթյուրումները սկսել են Հեյդար Ալիևի օրոք և հիմա լայն տարածում է գտել:
 

Ադրբեջանական կեղծիքի բացահայտումները պարունակող այս կայքը չորս օրում 15 հազարից ավելի այցելու է ունեցել: Ի դեպ, Ադիբեկյանի խոսքերով, կայքէջի տարածմանը մեծապես նպաստել են նաև ադրբեջանցիները, ովքեր հասցեն տարածել են իբր հակահայկական նյութեր պարունակող սայթ:  

Ադրբեջանական այն հիստերիայի մասին, թե միլիոնավոր դոլարներ է ծախսում հայկական կողմը ադրբեջանական հակաքարոզչություն իրականացնելու համար, նախաձեռնության նախագահ Արմինե Ադիբեկյանը հայտարարեց, որ կայքի ստեղծման համար ընդամենը ծախսվել է 108 դոլար 80 ցենտ, նախաձեռնության անդամներն աշխատել են և դատական փորձագետներն ու այլ մասնագետներ աջակցել են հասարակական սկզբունքով: Ա. Ադիբեկյանն ասաց, որ կայքում տեղադրված նյութերը զետեղվելու են գրքում, որոնք կբաժանվեն միջազգային կառույցների ղեկավարներին: