Ձեր վստահելի աղբյուրը

ԱՄՆ Կոնգրեսի անդամ Ադամ Շիֆը մարտի 2-ին հայտարարություն է արել` կապված Սումգայիթի ջարդերի հետ, ինչի կապակցությամբ նրա գրասենյակը տարածել է հաղորդագրություն:

Ամերիկացի կոնգրեսականը, հիշեցնելով, որ 22 տարի է անցել հայտնի իրադարձություններից, նշել է.

«1988թ. եռօրյա սպանդի հետևանքով զոհվեցին բազմաթիվ հայեր, նրանցից շատերին այրեցին` դաժանաբար ծեծի ու խոշտանգումների ենթարկելուց հետո։ Հարյուրավոր հայեր վիրավորվեցին։ Կանանց և աղջիկներին դաժանաբար բռնաբարեցին։ Ջարդերի հետևանքով հազարավոր հայեր դարձան փախստականներ»։

Ադամ Շիֆն ուշադրություն է հրավիրել այն հանգամանքին, որ Ադրբեջանի իշխանությունները երբեք բավարար չափով չեն հետաքննել հայերի կոտորածները։
 
«Արյունահեղության կազմակերպիչներից և մասնակիցներից շատերն այժմ բարձր պաշտոններ են զբաղեցնում Ադրբեջանի կառավարությունում։ Օրինակ, Սումգայիթի ջարդերից մի քանի օր առաջ Ադրբեջանի «Կոմունիստական կուսակցության» առաջնորդ Հիդայաթ Օրուջևը նախազգուշացրել էր հայերին, որ եթե «դուք չդադարեք քարոզել Լեռնային Ղարաբաղը Հայաստանին միավորելը, ապա 100 հազ. ադրբեջանցիներ կներխուժեն ձեր տներ, կհրդեհեն ձեր բնակարանները, կբռնաբարեն ձեր կանանց և կսպանեն ձեր երեխաներին: Իսկ այժմ Օրուջևը Ադրբեջանի նախագահ Իլհամ Ալիևին կից էթնիկական հարցերով պետական հանձնաժողովի նախագահն է»,- նշել է կոնգրեսականը:

Կոնգրեսի անդամը տեղեկացրել է, որ Ադրբեջանի կառավարությունը հետևողական ջանքեր է գործադրել` իրականությունը թաքցնելու համար, սակայն ականատեսները կարողացել են ներկայացնել ադրբեջանցի հրոսակների վայրագություններ ու ոստիկանների անգործությունը վկայող փաստեր:

«Սումգայիթյան ջարդերը հանգեցրին Ադրբեջանի ազգային փոքրամասնությունների ավելի լայն կոտորածի, ինչը փաստացիորեն բերեց Ադրբեջանի 450 հազարանոց հայկական համայքնի վերացմանը, իսկ կուլմինացիան դարձավ Լեռնային Ղարաբաղի դեմ սանձազերծված պատերազմը: Այդ պատերազմը երկու կողմից խլեց 30 հազար մարդու կյանք»,- նշել է նա:

«Ապրիլին կնշվի Հայոց ցեղասպանության 95-րդ տարելիցը, մի հանցագործություն որի ժխտման համար Ադրբեջանի դաշնակից ու պաշտպան Թուրքիան հսկայական քաղաքական ռեսուրսներ է վատնում: Եվ այժմ, քանի որ մենք չենք կարող թույլ տալ, որ 20-րդ դարի առաջին ցեղասպանությունը մնա պատմության գրկում, չպետք է մոռանանք նաև Սումգայիթի զոհերի հիշատակը»,- եզրափակել է նա: