Ձեր վստահելի աղբյուրը

«Ապօրինի ու խայտառակ որոշում եմ համարում», -այսօր ՀՀ Վերաքննիչ քրեական դատարանում Նիկոլ Փաշինյանի գործով դատարանի կայացրած վճռից հետո լրագրողների հետ զրույցում հայտարարեց Փաշինյանի պաշտպան Լուսինե Սահակյանը, նկատելով, որ դա անսպասելի չէր, քանզի «օրինական որոշում ՀՀ ոչ մի դատական ատյանից չեն ակնկալում»:


Ինչպես ավելի վաղ Panorama.am-ը տեղեկացրել էր, Վերաքննիչ դատարանը այսօրվա նիստում հետևյալ կազմով` նախագահ Սերժիկ Ավետիսյան և անդամներ` Մարգո Սիմոնյան ու Արշակ Խաչատրյան, որոշեց մերժել պաշտպաններ Լուսինե Սահակյանի ու Երվանդ Վարոսյանի, ինչպես նաև մեղադրող կողմի վերաքննիչ բողոքներն ու Կենտրոն և Նորք Մարաշ համայնքների ընդհանուր իրավասության դատարանի հունվարի 19-ի վճիռը թողնել անփոփոխ:


Հիշեցնենք, որ այդ վճռի համաձայն, Նիկոլ Փաշինյանը դատապարտվել էր 7 տարի ազատազրկման` մեղավոր ճանաչվելով ՀՀ Քրեական օրենսգրքի 225 հոդվածի 1-ին մասով` զանգվածային անկարգություններ կազմակերպելը և արդարացվել էր Քր.օր.-ի 316 հոդվածի 1-ին մասով՝ բռնություն իշխանության ներկայացուցչի նկատմամբ:


Այնուհետև, ըստ Վերաքննիչի որոշման, Փաշինյանի նկատմամբ կիրառվեց համաներում` Համաներման մասին ՀՀ Ազգային ժողովի համապատասխան որոշմամբ նախատեսված պատժաչափի չկրած մասը կրճատելով:


«Մենք միշտ ասել ենք, որ իրենց համաներմանը չենք սպասում, որովհետև Նիկոլ Փաշինյանը հանցագործություն չի գործել: Մենք արդարացման դատական վճիռ էինք ակնկալում, այդուհանդերձ դատարանը կիրառեց համաներում, և պատժի չկրած մասը պետք է կիսով չափ կրճատվի: Դա պետք է աներ դեռ առաջին ատյանի դատարանը, և Վերաքննիչ դատարանն այդ մասով փորձեց որոշակի շտկումներ մտցնել դատական ակտի մեջ», հայտարարեց Լուսինե Սահակյանը` նկատելով, որ ըստ էության Վերաքննիչ դատարանը սրբագրեց առաջին ատյանի դատարանի որոշումը:


Փաստաբանը տեղեկացրեց, որ մեկ ամսվա ընթացքում Վերաքննիչ քրեական դատարանի որոշումը բողոքարկելու են Վճռաբեկ դատարան: «Չնայած նորից եմ կրկնում` ոչ մի հույս չունենալով, որ դատարաններն այս գործով կկայացնեն արդար դատական ակտ, որովհետև այս գործերով դատարանները չեն, որ դատական ակտ են կայացնում», -հավելեց պաշտպանը` նշելով, որ բողոքարկելու են վճիռը Վճռաբեկ դատարանում, որպեսզի կարողանան դիմել Մարդու իրավունքների Եվրոպական դատարան:

Ի դեպ, մեղադրող կողմն այսօր դատարանի դահլիճում ներկայացված չէր:


«Նրանք էլ գիտեն, որ ձևական բողոք են բերել: Այսինքն, նրանք ձևականորեն էին ներկայացված Վերաքննիչ դատարանում և դատական ակտը նրանց չէր հետաքրքրում: Նրանք գիտեին վերջնական որոշումն ինչպիսին պիտի լիներ», -նկատեց Սահակյանը:


Այսպիսով, պատժաչափի չկրած մասի հաշվարկը կատարվելու է որոշման` օրինական ուժի մեջ մտնելուց հետո: Քրեական դատավարության մասին օրենքի համաձայն որոշումն օրինական ուժի մեջ է մտնում հրապարակումից մեկ ամիս հետո: Սակայն այդ մեկ ամսվա ընթացքում կողմերին հնարավորություն է տրվում վճիռը բողոքարկել Վճռաբեկ դատարան: