Ձեր վստահելի աղբյուրը

Թալեաթ փաշայի վերջերս հրապարակված օրագրում կան փաստեր հայերի բռնի իսլամացման վերաբերյալ: Այսօր լրագրողների հետ հանդիպման ժամանակ հայտարարեց թուքագետ Ռուբեն Մելքոնյանը:

«Նույնիսկ նրա ձեռագրով գրված է, թե քանի հազար հայ երեխա է որբ մնացել և որ տարածքներում են նրանք: Կա նրա կարգադրությունը, որ այս երեխաներին մուսուլմանական ընտանիքներին բաշխեն, այն պայմանով, որ նրանց տրվի իսլամական կրթություն և հատուկ շեշտված է, որ նրանց բաժանեն այն տարածքներում, որտեղ չկան քրիստոնայներ և հայեր…որպեսզի այս երեխաները հետագայում էլ իրենց ակունքներին վերադառնալու հնարավորություն չունենան», մանրամասնեց նա:

Բռնի իսլամացված հայերի թեման գրքի վերածելիս` թուրքագետը աշխատել է թուրքական արխիվների հետ, սակայն, ինչպես ինքը նշեց, անձամբ չի աշխատել արխիվներում:

«Թուրքական արխիվների որոշակի փաստաթղթեր վերջին տարիներին հրապարակվել են: Այդ արխիվներն հավաստի են այնքանով, որ ներկայացված են բնօրինակները»,-ասաց Ռ. Մելքոնյանը:

Այնուամենայնիվ, աշխատելով թուրքական աղբյուրների հետ, ինչպես նշեց թուրքագետը, մասնագետները` մասնավորապես թուրքագետները, խնդիր ունեն զտելու տվյալները, քանի որ գոյություն ունի խեղաթյուրման և իրականության շատ բարակ սահման, որը մասնագիտական աչքը պիտի նկատի:

Ռ. Մելքոնյանը ասաց, որ այս արխիվները և նյութերն ուսումնասիրելիս դրանք ենթարկել են լուրջ զտման:

«Համադրել ենք հայկական արխիվներում եղած տվյալների հետ»,-բացատրեց թուրքագետը: