Ձեր վստահելի աղբյուրը

Մոսկվա կինոթատրոնի ամառային դահլիճը մշակութային արժեքների ցուցակից հանելու, քանդելու և հողը եկեղեցու օգտին օտարելու կառավարության որոշումը Ճարտարապետների միության նախագահ Մկրտիչ Մինասյանը շտապողական համարեց:
«Մեր կարծիքով, Կառավարությունը շտապ որոշում է կայացրել, մենք բազմաթիվ խնդիրներ ունենք, որոնք շտապ որոշումներ են պահանջում, սակայն կարող են երկար ժամանակ մնալ անորոշ վիճակում: Իսկ այդ խնդրի վերաբերյալ շտապ որոշում կայացվեց` հաշվի չառնելով ոչ մեկի կարծիքը»,- այսօրվա ասուլիսում ասաց ճարտարապետների միության նախագահը:

Նա հայտնեց, որ այսպիսի որոշում ընդունելուց առաջ հարկավոր էր խորհրդակցել մասնագիտական միությունների, մասնագետների հետ: Մ. Մինասյանի հավաստմամբ, Պողոս-Պետրոս եկեղեցին կառուցվել է վատ ժամանակահատվածում, երբ հնարավոր չի եղել արժեք ունեցող հուշակոթող կառուցել և քանդված եկեղեցու ճարտարապետական արժեքը գնահատեց «զրոյական»: Նաև շեշտեց, որ եկեղեցին եղել է այսօրվա «Մոսկվա» կինոթատրոնի հիմնական շենքի տեղում, այլ ոչ` ամառայինի:
Ժամանակին բարձր գնահատված համալիրի փոխարեն այժմ եկեղեցի կառուցելը ճարտարապետը սխալ քայլ համարեց նաև նշելով, որ Սայաթ-Նովա – Աբովյան խաչմերուկում արդեն գործում է Կաթողիկե եկեղեցին:

«Այն ժամանակ, երբ Կաթողիկեի փոխարեն Լեզվի ինստիտուտն էր, մենք հանգիստ կարողացանք ինստիտուտի շենքը քանդել ու դրա փոխարեն եկեղեցի կառուցել, բայց այս քայլը սխալ կլինի, քանի որ ամառային դահլիճը ինքը ճարտարապետական հուշակոթող է համարվում և համալիրի մի մաս է կազմում»,-ասաց Մ. Մինասյանը:
Ասուլիսին ներկա երիտասարդ ճարտարապետ Սարհատ Պետրոսյանն իր հերթին նշեց, որ կինթատրոնի ամառային դահլիճը հանդիսանում է 20-րդ դարի ճարտարապետական լավագույն օրինակներից մեկը:
 
Ս. Պետրոսյանի հավաստմամբ, իրենք խնդիր չունեն եկեղեցիների կառուցման հետ կապված, սակայն, այս դեպքում Պողոս-Պետրոս եկեղեցու նախկին տեղի հետ կապված մեջբերումները անհիմն են համարեց` եկեղեցին նախկինում կինոթատրոնի ամառային դահլիճի տեղում չի եղել կառուցված:
«Բացի այդ, «Կինոմոսկվայի» ամբողջ համակառույցը, որը մեր բոլորիս սեփականությունն է, պետությունն անհատույց տրամադրել է մասնավոր կազմակերպության, որպեսզի դա օգտագործվի որպես կինոթատրոն: Իսկ սեփականատերը իրավունք չունի անվճար ստացած գույքի մի մասն օտարել ցանկացած մեկի` ցանկացած բան կառուցելու համար»,-ասաց նա:
Հստակեցնելու համար իրենց դիրքորոշումը, ճարտարապետները նշեցին, որ դեմ չեն եկեղեցի կառուցելուն, սակայն գտնում են, որ այն կարելի է կառուցել մեկ այլ վայրում, ոչ թե կինո «Մոսկվայի» ամառային դահլիճի տարածքում:

Որպես լավագույն տարբերակ, երիտասարդ ճարտարապետը նշեց, որ եկեղեցի կարելի է կառուցել նույն տարածքում` Նկարիչների միության նոր մասնաշենքի տեղում, որը ներկայումս քանդված վիճակում է գտնվում, կամ էլ Շառլ Ազնավուրի հրապարակի տարածքում:

Ասուլիսում շահագրգիռ մյուս կողմն էր ներկայացնում Արարատի եկեղեցու հոգևոր հովիվ Տեր Մխիթար Ալոյանը: Նա զարմանալի համարեց, որ ճարտարապետները միահամուռ արձագանքում են կինոթատրոնի ամառային դահլիճի` եկեղեցով փոխարինելու խնդրին այն դեպքում, երբ Երիտասարդական պալատի, կամ այլ ճարտարապետական արժեքների քանդման ժամանակ ոչ ոք իր բացասական կարծիքը չի արտահայտել:

«Եթե սեփականատերը դահլիճը քանդեր ու դրա փոխարեն կաբարե կամ բասեին կառուցեր դուք կբողոքեի՞ք… Դուք խոսում եք ճարտարապետական արժեքների մասին, բայց մենք ուզում ենք այն, ինչ մեր սեփականությունն է եղել: Դուք ասում եք, որ եղեկեցին զրոյական արժեք է ունեցել...մեր գյուղական բոլոր դպրոցները նույնպես զրոյական արժեք ունեն, բայց այնտեղ կրթվում ու դաստիարակվում են մեր զավակները»,-ասաց Տեր Մխիթարը:

Հոգևոր հովիվի կարծիքով այստեղ խնդիրն այն է, որ պարզապես բոլորը միահամուռ կերպով չեն ցանկանում եկեղեցի կառուցել, իսկ կինոդիտումները, ըստ նրա, կարելի է իրականացնել նաև կինոթատրոնի ձմեռային դահլիճում: Տեր Մխիթարը նշեց, որ հիմքում ընկած է այն գաղափարը, որ եկեղեցին կառուցվի իր նախկին տեղում:

Այստեղ էլ ճարտարապետները կրկին հիշեցրին, որ իրականում կինթատրոնի հիմնական շենքի տեղում է եկեղեցին կանգնած եղել, ու հետաքրքրվեցին, թե այդ դեպքում ինչո՞ւ պահանջ չկա կինոթատրոնի մեծ շենքը քանդելու:
Բացի այդ, ճարտարապետների միության նախագահը նշեց, որ համալիրները երկուսն էլ գտնվում են արժեքավոր ճարտարապետական հուշակոթողների շարքում և այստեղ արդեն տարբերություն չկա, թե նրանցից որը կքանդվի, քանի որ երկուսն էլ նույն ճարտարապետական արժեքն ունեն:

Ճարտարապետներին հետաքրքրեց, թե իրականում ո՞վ է բարերարը, և ո՞վ է հուշել, թե այդտեղ է եղել եկեղեցին:
Տեր Մխիթարը միայն ենթադրեց, թե` հնարավոր է նա Երևանի քաղաքացի է եղել ու ինքն է որոշել եկեղեցու «նախկին տեղում» հիմնել նորը:

Իր խոսքի վերջում Տեր Մխիթարը նշեց` եթե կառավարությունը որոշել է, որ եկեղեցու կառուցման համար պետք է այդ տարածքը տրամադրել, ապա` խելոք է որոշել:

Ճարտարապետները հայտնեցին, թե դիմում են կաթողիկոսին` վերանայելու կինոթատրոնի ամառային դահլիճի տեղում եկեղեցի կառուցելու որոշումը: