Էրդողանը Մերկելի հետ քննարկել է Ցեղասպանության բանաձևի հարցը

Տարածաշրջան 10:57 30/03/2010

Էրդողանը Մերկելի հետ քննարկել է Ցեղասպանության բանաձևի հարցը

Նախօրեին երկօրյա պաշտոնայցով Անկարա ժամանած Գերմանիայի կանցլեր Անգելա Մերկելը հանդիպել է Թուրքիայի վարչապետ Թայիփ Էրդողանի հետ: Հանդիպումից հետո Մերկելն ու Էրդողանը կառավարության շենքում հրավիրել են մամուլի ասուլիս: Այս մասին հայտնում է թուրքական CNNTurk-ը:

Գերմանացի լրագրղի հարցին, թե արդյոք հանդիպմանը քննարկվել է Հայոց ցեղասպանության բանաձևի հարցը, Էրդողանը հաստատող պատասխան է տվել: Մերկելի հետ քննարկել են ԱՄՆ-ում և Շվեդիայում իրականացված քվեարկությունները և եզրահանգել, որ այդ բանաձևերի ընդունումը վնասում է հայ-թուրքական կարգավորման գործընթացը:

«Թողնենք պատմաբաններին, թող պատմաբանները դա լուծեն, խորհրդարաններն այդ հարցի լուծման վայր չեն»,- ասել է Էրդողանը` հիշեցնելով, որ Դավութօղլուն զանգահարել է պետքարտուղար Քլինթոնին և հայտնել Անկարայի մտահոգությունը խնդրո առարկայի վերաբերյալ:

Մերկելն էլ իր հերթին նկատել է. «Անհրաժեշտ է, որ Հայաստանի և Թուրքիայի միջև հարաբերությունները լավ կերպով զարգանան: Այդ իմաստով հուսադրող քայլեր կատարվում են»:

Տեղեկացվում է նաև, որ Գերմանիայում թուրքական դպրոցներ բացելու Էրդողանի առաջարկն այս անգամ այլ արձագանք է ստացել Մերկելի կողմից:

Հիշեցնենք, որ օրեր առաջ Գերմանիայի կանցլերը, ի պատասխան Էրդողանի այդ առաջարկին, ասել էր, որ Գերմանիայում բնակվող թուրքերը պետք է հաճախեն գերմանական դպրոց: Իսկ երեկ Մերկելը հայտարարել է, որ կողմերն արդեն համաձայնության են եկել նշված հարցի շուրջ: Տեղեկացվում է նաև, որ Թուրքիայի վարչապետը Գերմանիայի կանցլերին ցանկություն է հայտնել փոխադարձաբար հանել երկու երկրների միջև վիզային (մուտքի արտոնագրային) ռեժիմը: Մերկելն էլ այդ առնչությամբ ասել է. «Մենք կաշխատենք այդ ուղղությամբ»:

Նշենք, որ նախատեսված է նաև Գերմանիայի կանցլերի հանդիպումը Թուրքիայի նախագահ Աբդուլլահ Գյուլի հետ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: