Ձեր վստահելի աղբյուրը

Արժույթի միջազգային հիմնադրամի և Հայաստանի միջև կնքված վարկային համաձայնագրի շրջանակում հիմնադրամը 73.6 մլն դոլար է հատկացրել: Այս մասին նախօրեին հայտարարել է հիմնադրամի վաշինգտոնյան կենտրոնակայանը:

«Իտառ-Տասս»-ի հաղորդմամբ, այդ համաձայնագրի շրջանակում, Հայաստանն արդեն հիմնադրամից ստացել է 532 մլն դոլար: Հիմնադրամի փոխտնօրեններից մեկը՝ Մուրիլո Պորտուգալը նշել է, որ Հայաստանը լուրջ աշխատանք է կատարել: Ըստ նրա, կարծես թե Հայաստանի տնտեսությունը ճգնաժամից հետո արդեն մտել է վերականգնողական փուլ, և դա հաջողվել է մոնետար ու հարկային միջոցառումների շնորհիվ:

 ԱՄՀ-ի  հայաստանյան գրասենյակից տարածված տեղեկատվության մեջ այս մասին նշվում է .

«ԱՄՀ-ն ավարտել է Հայաստանի համար Ստենդբայ համաձայնագրի շրջանակում երրորդ ուսումնասիրությունը և հաստատել 73.6 միլիոն ԱՄՆ դոլարի տրամադրումը:
ԱՄՀ գործադիր խորհուրդն այսօր ավարտել է պահուստային (ստենդբայ) համաձայնագրի օժանդակությամբ իրականացվող ծրագրի շրջանակում Հայաստանի տնտեսական կատարողականի երրորդ ուսումնասիրությունը: Որոշումը հնարավորություն է տալիս անմիջապես տրամադրել 48.485 միլիոն SDR գումար (փոխառության հատուկ իրավունք) (շուրջ 73.6 միլիոն ԱՄՆ դոլար)` մինչ այժմ ստացումների հանրագումարը հասցնելով SDR 350.425 միլիոնի (շուրջ 532.2 միլիոն ԱՄՆ դոլար): Արժույթի միջազգային հիմնադրամի գործադիր խորհուրդը հավանություն է տվել 2009 դեկտեմբերի վերջի Հայաստանի Հանրապետության կենտրոնական բանկի զուտ ներքին ակտիվների համար նախատեսված քանակական կատարողական չափորոշիչի չկատարման համար բացառություն անելու խնդրանքին: 368.0 միլիոն SDR-ի (շուրջ 558.9 միլիոն ԱՄՆ դոլար) հավասար գումարով 28-ամսյա ստենդբայ համաձայնագիրը հաստատվել է 2009թ.-ի մարտի 6-ին, ընդ որում հասանելի ընդհանուր գումարը 2009 թ.-ի հունիսի 22-ին ավելացվել է` այն հասցնելով 533.6 միլիոն SDR-ի (շուրջ 810.4 միլիոն ԱՄՆ դոլար):

Գործադիր խորհրդի` Հայաստանին նվիրված քննարկումից հետո կառավարիչ տնօրենի տեղակալ և նախագահողի պաշտոնակատար Մուրիլո Պորտուգալը նշել է. «ԱՄՀ-ի հետ ստենդբայ համաձայնագրի շրջանակում Հայաստանը բարձր կատարողական է դրսևորել, իսկ տնտեսական անկման ամենասուր փուլը, ըստ ամենայնի, ավարտված է, ինչին օժանդակել են սատարող դրամավարկային և հարկաբյուջետային քաղաքականությունները: Դեռևս դյուրաբեկ վերականգնման սատարումը, արտաքին խոցելիություններին դիմակայումը և միջնաժամկետում վստահելի հարկաբյուջետային համախմբման ծրագրի առաջ մղումը շարունակում են դժվարին խնդիրներ լինել:

Հարկաբյուջետային քաղաքականությունը նպատակաուղղված է վերականգնմանն աջակցելուն` միևնույն ժամանակ 2010 թ.-ին սկսելով հակրաբյուջետային աստիճանական համախմբումը: Սոցիալական ծախսերը կպաշտպանվեն: Իշխանություններն հանձն են առել հարկային քաղաքականության և վարչարարության, ինչպես նաև պետական ծախսերի և պարտքի կառավարման ուղղությամբ բարեփոխումներում արձանագրել լավ առաջընթաց:

Դրամավարկային քաղաքականությունը նպատակաուղղված է հարմարվողականից առավել չեզոք դիրքի անցմանը` հնարավոր գնաճային ճնշումները կանխելու համար: Իշխանությունները հանձն են առել իրականացնել ճկուն փոխարժեքի ռեժիմ և նպատակ ունեն ամրապնդել դրամավարկային փոխանցման մեխանիզմը` դրամավարկային գործիքների արդյունավետությունը բարելավելու, ինչպես նաև կենտրոնական բանկի հաղորդակցության ռազմավարությունը բարելավելու նպատակով:
Ֆինանսական հատվածը շարունակում է առողջ և լավ կապիտալացված լինել. իշխանությունները ամրապնդել են ճգնաժամին պատրաստվածության և չնախատեսված դեպքերի ծրագրավորման շրջանակները: Հետագա բարեփոխումները կկարևորվեն ռիսկերին շարունակական դիմակայման ապահովման տեսանկյունից :

Իշխանությունները հանձն են առել հետամուտ լինել լայնահեն կառուցվածքային բարեփոխումների` բաց առևտրային ռեժիմի, գործարարության բարելավված միջավայրի, առավել լավ կառավարման և տնտեսության առանցքային ճյուղերում մրցակցության ավելացման միջոցով արտադրողական կարողությունների կատարելագործման և երկարաժամկետ աճի խթանման համար»: