Ձեր վստահելի աղբյուրը

Հանրապետությունում խոզի գրիպի նոր դեպքեր չեն գրանցվում: Այս մասին Panorama.am-ին հավաստում են թե՛ հանրապետության գլխավոր համաճարակաբան Արա Ասոյանը, թե՛ առողջապահության նախարարության պետական հիգիենիկ և հակահամաճարակային տեսչության վարակիչ և ոչ վարակիչ հիվանդությունների հսկման բաժնի պետ Լիլիթ Ավետիսյանը:

Ա. Ասոյանը վստահեցրեց, որ «Նորք» ինֆեկցիոն հիվանդանոցում խոզի գրիպով վարակվածության նույնիսկ կասկածելի դեպքեր չկան, իսկ Ա. Ավետիսյանն էլ նշեց, որ հանրապետությունում այս առումով իրավիճակը վերահսկվելի է ու նոր դեպքեր չեն գրանցվել:

«Մենք մոնիտորինգներ ենք անցկացնում և հավատացած եղեք, որ ոչ մի նոր դեպք չի եղել: Հիմնականում աշխարհում էլ է վիճակը հանդարտ: Դեպքեր գրանցվում են Աֆրիկյան երկրներում, բայց ոչ այն արագությամբ, ինչ համաճարակի ժամանակ էր»,-ասաց Լ. Ավետիասյանը:

Ինչ վերաբերում է հարևան Իրանից օրերս դեպի Հայաստան իրանցիների «հոսքին», ու հարցին` արդյո՞ք նրանք կարող էին վարակի «բերման» առիթ դառնալ, Լ. Ավետիսյանը նշեց, որ, ընդհանրապես, անհանգստանալու կարիք չկա, քանի որ Իրանում իրավիճակը այդ առումով «շատ լավ է»:

Նա նկատեց, որ Իրանում խոզի գրիպով հիվանդացության ոչ մի դեպք չկա, բացի այդ ավելացրեց, որ օդանավականայններում մարդկանց ջերմաստիճանի ստուգումները` համապատասխան սարքի միջոցով, շարունակվում են:

Խոսելով սուր շնչառական վարակներից (ՍՇՎ), Ա. Ասոյանը նշեց.

«Այ դա իսկապես անհանգստանալու առիթ է տալիս»:

Ըստ նրա, ՍՇՎ-ներով վարակվածության դեպքերն ավելանում են, հիմնականում այն դիտվում է երեխաների շրջանում:

Լ. Ավետիսյանն էլ նշեց, որ նախարարությունը մոնիտորինգ է անցկացնում ու այս տարի ՍՇՎ-ների գրանցված դեպքերի թիվը չի գերազանցում անցյալ տարվա ցուցանիշին:

«Կա մրսածության գործոնը, որը այսպիսի փոփոխական եղանակին նպաստում է մարդկանց մոտ սուր շնչառականի նախանշանների հայտնվելուն»,-նշեց տեսչության վարակիչ և ոչ վարակիչ հիվանդությունների հսկման բաժնի պետը:

Հարակից նորություն`

ՍՇՎ. Մասնագետները պնդում են, թե «անհանգստանալու կարիք չկա»