Ձեր վստահելի աղբյուրը

Հնդկաստանում Հայաստանի դեսպան Արա Հակոբյանն օրերս հանդիպել է Հնդկաստանի առևտրի և արդյունաբերության նախարար Անանդ Շարմայի հետ:

Դեսպան Հակոբյանն ընդգծել է հայ-հնդկական հարաբերություններին բնորոշ ջերմ և բարեկամական բնույթը, երկու ժողովուրդներին միավորող ընդհանուր արժեքների և ավանդույթների առկայությունը ու երկկողմ քաղաքական երկխոսության բարձր մակարդակը: Նա նաև կարևորել է երկու երկրների միջև ակտիվ համագործակցությունը միջազգային կազմակերպությունների շրջանակներում: Այս մասին հայտնեցին ԱԳՆ մամուլի և տեղեկատվության վարչությունից:

Դեսպանը փաստել է, որ երկկողմ առևտրատնտեսական կապերի ոլորտում առկա ներուժը բավարար չափով չի օգտագործվում: Այդ համատեքստում կողմերն անդրադարձել են առևտրատնտեսական համագործակցության զարգացման հեռանկարային ուղղություններին` մասնավորապես քննարկելով երկկողմ առևտրային ռեժիմի ազատականացման, գործարար շրջանակների պատվիրակությունների փոխայցելությունների իրականացման, փոխադարձ ներդրումների խրախուսման և համատեղ ձեռնարկությունների ստեղծման հետ կապված հարցեր: