Ձեր վստահելի աղբյուրը

Իջևանում քիչ առաջ տեղի ունեցավ քաղաքի բժշկական կենտրոնի բացման արարողությունը, որին ներկա էին Հայաստանի նախագահ Սերժ Սարգսյանը, առողջապահության նախարար Հարություն Քուշկյանը, Համաշխարհային բանկի հայաստանյան գրասենյակի, առողջապահության նախարարության և մարզային իշխանությունների ներկայացուցիչները և այլն:

Լրագրողների հետ զրույցում նախարար Հարություն Քուշկյանը կարևորեց նման կենտրոնի բացումը Հայաստանի հյուսիս–արևելյան տարածաշրջանի համար` նշելով, որ կենտրոնը ստեղծվել է ՀՀ կառավարության և Համաշխարհային բանկի ֆինանսական աջակությամբ:

Նա շեշտեց, որ Իջևանում բժշկական կենտրոնի բացումը տեղի է ունեցել համաձայն ՀՀ նախագահի` «Մարզերի համաչափ զարգացման» ծրագրի:

Հ. Քուշկյանն ընդգծեց, որ կենտրոնը հագեցած է ժամանակակից կարևոր սարքավորումներով, ունենալու է հեռահաղորդակցման 24-ժամյա կապ Երևանի «Էրեբունի» և «Գրիգոր Լուսավորիչ» բժշկական կենտրոնների հետ, որի միջոցով Կենտրոնի բժիշկները կկարողանան քննարկել առավել կարևոր հարցերը: Նախարարը նշեց նաև, որ Կենտրոնի կադրերը համալրվելու են Երևանից լավագույն բժիշկների գործուղման ճանապարհով:

Նշենք, որ կենտրոնը ստեղծվել է 2007 թվականին` Իջանի հիվանդանոցի և Պոլիկլինիկայի նեղ մասնագիտացված դիսպանսեր ծառայությունները մեկ ՓԲԸ-ի` Իջևանի Բժշկական կենտրոնի վերածելով:

Կենտրոնի շինարարական աշխատանքներն ավարտվել են այս տարվա մարտին: Ընդհանուր ներդրումները կազմել են շուրջ 2,3 մլն դոլարին համարժեք դրամ: Կենտրոնում ներկայում աշխատում է 24 բժիշկ, 33 միջին բուժաշխատող, 6 վարչական և 18 այլ աշխատող:

Ընդհանուր առմամբ, վերանորոգվել է շուրջ 3,5 հազար քմ մակերես: Իրականացվել է բժշկական կենտրոնի վիրաբուժական և մանկաբարձական մասնաշենքների ամբողջական վերանորոգումը: Այն նախատեսված է ընդունարանի, ինտենսիվ բուժման, ախտորոշիչ բաժանմունքների և վիրասրահների համար:

Նախարար Հ. Քուշկյանը նշեց, որ կենտրոնը կկարողանա ամբողջությամբ հոգալ Տավուշի մարզի և հյուսիս-արևելյան ամբողջ տարածաշրջանի բնակչության առողջական խնդիրները:

Հարակից նորություն`  Նախագահ Սերժ Սարգսյանի աշխատանքային այցը` Տավուշ