Ձեր վստահելի աղբյուրը

Երևանի պետական ճարտարագիտական քոլեջում այսօր մեկնարկել է նախնական և միջին մասնագիտական ուսումնական հաստատությունների դասախոսների, արտադրական ուսուցման վարպետների և վարչական անձնակազմի վերապատրաստման եռամսյա դասընթացները, որոնք կկազմակերպվեն Երևանի և մարզերի 49 նախնական և միջին մասնագիտական ուսումնական հաստատություններում` 85 քոլեջի և արհեստագործական ուսումնարանի շուրջ 1200 դասախոսի և արտադրական ուսուցման վարպետի մասնակցությամբ: Այս մասին տեղեկացանք ԿԳՆ տեղեկատվության և հասարակայնության հետ կապերի վարչությունից:

Դասընթացների մեկնարկին ներկա էր նաև ՀՀ կրթության և գիտության նախարար Արմեն Աշոտյանը:

Դասընթացների անցկացման համար հիմք է ծառայել մասնագիտական պետական կրթական 61 չափորոշչի հաստատումը, որոնք փորձաքննության են ենթարկվել շահագրգիռ կողմերի ներգրավվածությունն ապահովող մասնակցային մոտեցման կիրառմամբ` ապահովելով սոցիալական գործընկերությունը ՄԿՈՒ ոլորտում, որից հետո հաստատվել են ՀՀ կրթության և գիտության նախարարի հրամանով և պետական գրանցում ստացել ՀՀ արդարադատության նախարարության կողմից:

Չափորոշիչներից 56-ը մշակել է Կրթության ազգային ինստիտուտի «Մասնագիտական կրթության և ուսուցման զարգացման ազգային կենտրոնը» (ՄԿՈՒԶԱԿ), ևս 5-ը` ՄԱԿ-ի զարգացման ծրագրերի շրջանակում: Դասընթացները կիրականացնի «Մասնագիտական կրթության և ուսուցման զարգացման ազգային կենտրոնը» ` Եվրամիության Հայաստանին տրամադրված բյուջետային աջակցության շրջանակում:

Մինչ բուն վերապատրաստման դասընթացների մեկնարկը նախարարը նախ շրջել է Երևանի պետական ճարտարագիտական քոլեջում, որն ընդգրկված է Եվրամիության բյուջետային աջակցության ծրագրով նախատեսված 12 բազմագործառութային քոլեջների ցանկում: Ծրագրի շրջանակում իրականացվել են քոլեջի կարողությունների ընդլայնում, վերանորոգման աշխատանքներ, համապատասխան սարքավորումներով նյութատեխնիկական բազայի համալրում, դասախոսական կազմի վերապատրաստում: Այցի ընթացքում նախարարը շրջել է նաև լսարաններում, զրուցեց դասախոսների և ուսանողների հետ:

Բացելով վերապատրաստման դասընթացները`Ա. Աշոտյանը նշել է, որ մշակված 61 չափորոշիչների հիմքում դրված է մոդուլային ուսուցման սկզբունքը և միտված է ուսումնառության արդյունքին և ուսանողների կարողությունների ձևավորմանը:
«Նախնական և միջին մասնագիտական կրթության ոլորտի բոլոր ներդրումները միտված են ՀՀ-ում կրթությունը համապատասխանեցնելու տնտեսական պահանջարկին: Երկար տարիներ «խեղված» է եղել մեր կրթական շուկան, այն է` բարձրագույն կրթության ոլորտում առկա է ավելի մեծ պահանջարկ, քան միջին մասնագիտականում: Եվրոպական երկրներում բուհի 1 շրջանավարտին ընկնում է 3 միջին մասնագիտական կրթությամբ ուսանող: Մեզ մոտ բարձրագույնի և միջին մասնագիտականի հարաբերակցությունը 2.5/1-ի է: Ըստ այդմ` բուրգը խեղված է, և քոլեջների նկատմամբ ուշադրությունը նախևառաջ պայմանավորված է տնտեսությանը լավագույնս սպասարկելու մղումով: Տասնյակ հազարավոր մասնագետներ, ովքեր ավարտել են պետական և ոչ պետական բուհերը, այսօր պահանջված չեն աշխատաշուկայում: Տնտեսության ավելի համահունչ և արագ զարգացումը պահանջում է, որ աշխատուժը լինի ավելի տարբերակված»,-նշել է Ա. Աշոտյանը` հավելելով, որ ներկայումս առկա են ներդրված սոցիալական գործընկերության լավ մեխանիզմներ` գործատուների և միջազգային կազմակերպությունների հետ համատեղ զարգացնելու միջին մասնագիտական կրթության ոլորտը, որը «տնտեսությանը սպասարկելու նպատակով իր վրա պետք է վերցնի ավելի մեծ «բեռ»»: Նախարարը նշել է, որ անցյալ տարի առաջին անգամ նախնական և միջին մասնագիտական կրթության ոլորտում արձանագրվել է ընդունելության տեղերի գերմրցույթ` լրացվել են բոլոր թափուր տեղերը: «Հուսով եմ, որ այս գործընթացը կկրի շարունակական բնույթ: Սա նշանակում է, որ առկա է մտածելակերպի փոփոխություն, կոնկրետ արհեստի և մասնագիտությանը տիրապետելու խնդիր` հետագայում աշխատանք գտնելու նպատակով: Բարեփոխումների հաջողության բանալին մեր բոլորի մտածելակերպի փոփոխությունն է»,-ընդգծեկ է նախարարը` ավելացնելով, որ «այս ձևաչափով և այս առիթով վերապատրաստումը, կարելի է ասել, անդրանիկն է իր տեսակով»:

Նա վերապատրաստվող անձնակազմին հորդորել է գործընթացը չսահմանափակել ֆորմալ մասնակցությամբ: «Այս վերապատրաստումներն իրենց մեջ կրում են մի կարևոր առանձնահատկություն` փորձել սովորեցնել իրար և աշխատել նորովի: Հաստատված չափորոշիչներն ընդամենը գործընթացի սկիզբն են և միջավայր ապահովող գործոնը: Ժամանակն է վերականգնել այն հավասարակշռությունը, որը բնորոշ է առողջ կրթական համակարգերի»,-շեշտել է Ա. Աշոտյանը: Նախարարն անդրադարձել է նաև ԵՄ աջակցության «Նոր հարևանության» ծրագրին` նշելով, որ այն ամենախոշորն է միջին մասնագիտական կրթության ոլորտում և միտված է աղքատության նվազման հաղթահարմանը:

Իր խոսքում Ա. Աշոտյանը կարևորել է նաև լրացուցիչ և շարունակական կրթության ապահովումը, որը, ըստ նախարարի, դեռևս կայացած չէ մեր հանրապետությունում:

«Լրացուցիչ և շարունակական կրթության խնդիրը ևս առաջացել է տնտեսության պահանջարկից: Բազմաթիվ մասնգետներ, մեկ անգամ կրթություն ստանալով, շատ հաճախ հնարավորություն չեն ունենում խորացնել իրենց գիտելիքները և անցնել համապատասխան վերապատրաստում: Համոզված եմ, որ լրացուցիչ կրթությունը հեռանկարային և պիտանի կլինի մեր կրթական համակարգի համար և, որ պակաս կարևոր չէ, կհզորացնի մեր ուսումնական հաստատությունները: Այս ոլորտում առկա է լուրջ ինստիտուցիոնալ և նորմատիվ բարեփոխումների անհրաժեշտություն»,-նշել է նախարարը: Նա ավելացրեց, որ միջին մասնագիտական կրթության ոլորտը սոցիալական գործընկերության և միջազգային համագործակցության տեսակետից առաջատարն է: Հանդիպման ավարտին նախարարը հաջողություն մաղթել է վերապատրաստման բոլոր մասնակիցներին: