Ձեր վստահելի աղբյուրը

Այսօր ԵԽԽՎ նախագահ Մևլութ Չավուշօղլուն հանդիպում է ունեցել Ադրբեջանի Միլի մեջլիսում ներկայացված քաղաքական ուժերի ներկայացուցիչների հետ: «Ժողովրդավարությունը դժվար ու երկար գործընթաց է: Ոչ միայն իշխանությունները, այլև ընդդիմությունը ևս պետք է աշխատանք տանեն, որպեսզի բարելավեն երկրում ստեղծված իրավիճակը»,- այս մասին, Թուրան լրատվական գործակալության փոխանցմամբ նշել է Մ. Չավուշօղլուն:

Ընդդիմադիր խորհրդարանական Ֆազիլ Մուստաֆաևը Չավուշօղլուի ուշադրությունն է հրավիրել Ադրբեջանի` Եվրոպայի խորհրդի առջև ստանձնած պարտավորությունների կատարման վրա: Նա միաժամանակ հարց է բարձրացրել Կենտրոնական ընտրական հանձնաժողովի գործունեության մեջ ընդդիմությանը ներգրավելու անհրաժեշտության վրա:

Մուստաֆաևը մեղադրել է Բաքվում Եվրոպայի խորհրդի գրասենյակին, քանի որ, ըստ պատգամավորի, այն իր պարտականությունները վատ է կատարում:

«Գրասենյակը խառնում է անձնական հարաբերությունները քաղաքականության հետ և տարբեր կուսակցությունների հետ հարաբերվելիս` խտրականություն դրսևորում վերջիններիս նկատմամբ»,- նշել է նա` ընդգծելով, որ ԵԽ Բաքվի գրասենյակին համապատասխան դիմում է ուղարկվել, սակայն ոչինչ այդպես էլ չի փոփոխվել:

Թուրան լրատվական գործակալությունը հայտնում է, որ Մուստաֆաևի մեղադրանքներն ամենայն հավանականությամբ վերաբերվել են տարեսկզբին տեղի ունեցած պատահարին, երբ ԵԽ պատվիրակությունը Բաքվում հետաձգել էր ընդդիմության հետ հանդիպումը` հանդիպելով իշխող կուսակցության ներկայացուցիչների հետ:

Մուստաֆաևի ելույթից հետո հանդես է եկել նաև մեկ այլ ընդդիմադիր խորհրդարանական` Պանախ Հուսեյնը, սակայն հանդիպման կամակերպիչները միանգամից դուրս են հրավիրել ԶԼՄ-ի ներկայացուցիչներին, ամենայն հավանականությամբ վախենալով, որ նա կշարունակի իշխանությունների քննադատությունը:

Իր հերթին, 1նյուզ.ազ լրատվական կայքը տեղեկացրել է, որ Բաքվում Չավուշօղլուն նշել է.

«Ես 7-8 տարի եղել եմ ԵԽ-ում Թուրքիայի ներկայացուցիչը և իմ գործունեության տարիներին ականատես եմ եղել կառույցում առկա երկկակի չափանիշներին: Ընտրվելով կառույցի ղեկավարի պաշտոնում, ասել եմ, որ հանդես եմ գալու երկակի չափանիշներ կիրառելու դեմ, քանի որ մենք ունենք ընդհանուր արժեքներ` պաշտպանել ժողովրդավարությունն ու մարդու իրավունքները: Հենց այդ պատճառով էլ մենք պետք է շրջանցենք երկակի չափանիշները, և այդ հարցի հետ կապված ես ամեն ինչ անելու եմ»: