Արվեստագետ «Պետք է ամեն ինչ անել, որպեսզի դպրոցներում շատ ավելի բարձր մակարդակի վրա դրվի օտար լեզուների ուսուցումը»

Կրթություն, գիտություն 15:47 19/04/2010

Այսօրվա ասուլիսում արվեստագետ Արևշատ Ավագյանը, խոսելով օտարալեզու դպրոցներ ստեղծելու ցանկության մասին, նշեց, որ ինքը դեմ է, որ ստեղծվեն հատուկ օտարալեզու դպրոցներ: «Մենք օտարների համար չենք պատրաստում մեր երեխաներին, մենք դաստիարակում ենք հայեցի մտածողությամբ երեխաներ, որոնք պետք է մեր երկրի ապագայի համար կարևոր գործ անեն, այլ ոչ թե մտածեն, որ այս երկիրը հնարավորինս շուտ թողնեն գնան»,-ասաց նա:

Նշենք, որ ԿԳՆ-ն ՀՀ կառավարություն է ներկայացրել «Լեզվի մասին» ՀՀ օրենքում փոփոխություններ կատարելու մասին օրենքի նախագիծը, ըստ որի առաջարկվում է ՀՀ-ում թույլատրել ստեղծել օտարալեզու դպրոցներ: Նշենք, որ «Լեզվի մասին» ՀՀ օրենքը ընդունվել է 1993 թվականին. դրանով դպրոցներում ուսուցման լեզուն միայն գրական հայերեն է, և չի թույլատրվում օտարալեզու դպրոցների գործունեությունը Հայաստանում:

Ըստ արվեստագետի, այսպիսի որոշումները կքայքայեն մեր ազգը և մեր պետությունը, և եթե օտարամոլությունը այսպես շարունակվի, ապա վաղը մենք ոչ մի կարգին մարդ չենք ունենք Հայաստանում, որ մտածի ազգի ինքնության և առաջընթացի մասին:

Նա նշեց, որ եթե նույնիսկ շատ քիչ լինեն օտարալեզու դպրոցները, ապա դա ևս խնդիր է մեզ նման փոքր բնակչություն ունեցող պետության համար: «Թեքումներով դպրոցները դեռ հանդուրժելի են, սակայն ստեղծել ամբողջությամբ օտար լեզվով դպրոց, ես դեմ եմ: Ուղղակի այսօր պետք է ամեն ինչ անել, որպեսզի դպրոցներում շատ ավելի բարձր մակարդակի վրա դրվի օտար լեզուների ուսուցումը»,-ասաց Արևշատ Ավագյանը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: