Ձեր վստահելի աղբյուրը

ՍԻՄ կուսակցությունը ողջունոմ է հայ-թուրքական գործընթացի կասեցումը: «Մենք ողջունում ենք Հայաստանի նախագահի այդ քայլը, բայց հույս ունենք, որ այն կամբողջացվի, այսինքն` մեր ստորագրությունը հետ կվերցնենք և հետագայում կրկին գործընթացը սկսելու ժամանակ կդնենք մեր նախապայմանները»,- Հայոց ցեղասպանության անմեղ զոհերի հիշատակը հավերժանող անմար կրակի մոտ ծաղիկներ դնելուց հետո ասաց կուսակցության առաջնորդ Հայկ Բաբուխանյանը:

Նա ասաց, որ Թուրքիան շարունակում է մնալ նույն ցեղասպանաստեղծ պետությունը, ու, եթե թույլ տան, նա կրկին կդիմի այդ քայլին, հետևաբար` Հայաստանն առանց նախապայմանների այլևս չպետք է խոսի նրա հետ և պետք է բարձրաձայնի իր կորցրած տարածքների վերադարձի հարցը և պատիժ պահանջի Ցեղասպանության համար:

Իսկ թե ի՞նչ մտորումներով է նա բարձրացել հուշահամալիր, պատասխանեց, որ քանի դեռ Հայոց ցեղասպանությունը չի ճանաչվել Թուրքիայի կողմից, այդ մտորումները նույնն է լինելու` պատժի ենթարկել թուրքերին, ազատագրել հայկական տարածքները, դրանից հետո բարձրացնել Հայաստանի մրցունակությունը, ամբողջ աշխարհի հայերին` որպես Հայաստանի քաղաքացիներ, կենտրոնացնել հզոր, միացյալ Հայաստանում: