Ն.Զոհրաբյան. «Ժամանակն է, որ միջազգային հանրությունը համարժեք գնահատական տա Մարաղայի, Սումգայիթի, Բաքվի ջարդերին»

Քաղաքական 15:20 27/04/2010

Շարունակվում են ԵԽԽՎ գարնանային նստաշրջանի աշխատանքները: Այսօրվա իր ելույթում հայկական պատվիրակության անդամ Նաիրա Զոհրաբյանն անդրադարձել է բավականին ցավոտ ու կարևոր մի խնդրի` հակամարտություններում կանանց նկատմամբ իրականացվող բռնություններին և նշել, որ այդ անձինք պետք է հանձնվեն արդարադատությանը, քանզի եթե այդպիսի հանցագործությունների համար մարդիկ չպատժվեն, ապա վեհաժողովի ամբիոնից հնչած ցանկացած միտք ոչինչ չարժե:

Ն.Զոհրաբյանն իր գործընկերների ուշադրությունն է դարձրել այն հանգամանքի վրա, որ 1992թ-ի ապրիլի 10-ին ադրբեջանցիների կողմից մի քանի ժամում հրի է մատնվել Ղարաբաղի Մարաղա գյուղը, ինչը Բրիտանիայի պարլամենտի անդամ, բարոնուհի Քոքսի կողմից որակվել է իբրև մեր օրերի Գողգոթա: Պատգամավորը ներկայացրել է ադրբեջանցիների վայրագությունների մասին տվյալներ ` 100 մարդու սպանել են ամենադաժան ձևերով` սղոցել, այրել, անդամահատել և այլն... նրանցից 30-ը կանայք են եղել. '

«Սակայն այս ամենից հետո Մարաղայի ցեղասպանության կազմակերպիչ Շահին Թալիբօղլի Թագիևն արժանանում է Ադրբեջանի ազգային հերոսի կոչման»,- իր ելույթում մատնանշել է պատգամավորը և ուշադրություն դարձրել այն հանգամանքին, որ Եվրոպայի խորհրդում կա երկիր, որը հրեշներին ոչ թե դատում է, այլ նման կոչումներ տալիս: Եվ նման դեպքերը բազմաթիվ են ղարաբաղյան հակամարտության պատմության ընթացքում:

Ելույթի վերջում տիկին Զոհրաբյանը հարց է ուղղել վեհաժողովի անդամ-երկրների ներկայացուցիչներին` այսքանից հետո ինչպե՞ս կարելի է վստահել Ադրբեջանի հայտարարություններին, թե իբր նա երաշխավորում է Ղարաբաղում ապրող ժողովրդի անվտանգությունը .

«Նման հանցագործությունները պետք է պատժվեն` անկախ վաղեմության ժամկետից. միջազգային հանրությունը պետք է համարժեք գնահատական տա Մարաղայի, Բաքվի, Սումգայիթի, Կիրովաբադի ջարդերին. ժամանակն է մտածել այդ մասին»,- հավելել է նա:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: