Համագործակցության նոր եզրեր` հայ-ղազախական հարաբերություններում
ՀՀ կրթության և գիտության նախարար Արմեն Աշոտյանն այսօր ընդունել է ՀՀ-ում Ղազախստանի Հանրապետության արտակարգ և լիազոր դեսպան Այիմդոս Բոզժիգիտովին: Այս մասին տեղեկացանք ՀՀ կրթության և գիտության նախարարության տեղեկատվության և հասարակայնության հետ կապերի վարչությունից:
Ողջունելով դեսպանին` նախարարը նշել է, որ երկու երկրների միջև ձևավորված ավանդույթներն ունեն դարերի պատմություն և պատահական չէ, որ այսօր Ղազախստանում ապրում է շուրջ 60 հազար հայ, ովքեր ակտիվ ներգրավված են բոլոր բնագավառներում` գործարարությունից մինչև գիտակրթական: «Վստահ եմ, որ հայ-ղազախական համագործակցությունն ունի ոչ միայն համատեղ անցյալ, այլև համատեղ ապագա, որի համար լավագույն հիմք կհանդիսանա միջմշակութային և կրթական կապերի զարգացումը»,-նշել է նախարարը` հավելելով, որ Ղազախստանի կառավարության ուշադրության կենտրոնում միշտ եղել են ազգային փոքրամասնությունների կրթության և աշխատանքի իրավունքի ապահովման խնդիրները:
Այս համատեքստում նախարարն անդրադարձել է նաև Սփյուռքի հայկական կրթօջախների` հայկական դասագրքերով ապահովման խնդրին: «Կառավարությունն ամեն տարի Սփյուռքի հայկական կրթօջախների համար ֆինանսավորում է շուրջ 40 հազար կտոր դասագրքերի հրատարակումը և դրանց փոխադրման ու տրամադրման աշխատանքներն արդյունավետ կազմակերպելու գործընթացում ակնկալում ենք նաև ՀՀ-ում գործող դեսպանատների աջակցությունը»,- նշել է նախարարը:
Դեսպանը նշել է, որ համագործակցության զարգացման համար առկա են բոլոր հիմքերը, և օրերս ԵՊՀ ղեկավարության հետ քննարկվել է համալսարանում ղազախերեն լեզվի և մշակույթի կենտրոն բացելու հնարավորության հարցը: Նա հավելեց, որ ազգությամբ հայ Ղազախստանի բազմաթիվ քաղաքացիներ, ովքեր այսօր սովորում են ՀՀ բուհերում, ցանկություն են հայտնել ուսումնասիրել ղազախերեն լեզուն, և ղազախական կողմը պատրաստ է միջոցներ տրամադրել այդ նախագծի իրականացման համար:
Հանդիպման ընթացքում անդրադարձ է եղել նաև օրերս Աստանայում տեղի ունեցած ԱՊՀ անդամ երկրների մանկավարժների առաջին համագումարին, որին մասնակցում էր նաև ՀՀ պատվիրակությունը` ՀՀ կրթության և գիտության նախարարի տեղակալ Մ. Մկրտչյանի գլխավորությամբ: Այցի ընթացքում ստորագրվել է կրթության և գիտության ոլորտում երկու երկրների միջև համագործակցության համաձայնագիր, որը նոր իրավական հիմքեր կստեղծի հետագա համագործակցության համար:
Լրահոս
Տեսանյութեր
Քաղաքապետարանը գործնականում թալանում է երևանցիներին. Չախոյան
