Ձեր վստահելի աղբյուրը

2008 թվականին Գազայի վրա իսրայելական զինուժի հարձակումից հետո Անկարա-Թել Ավիվ լարված հարաբերությունները նոր ճգնաժամի առջև են. 1915թ. Հայոց ցեղասպանության մասին հարցը 8 դեմ և 12 կողմ ձայների հարաբերակցությամբ ընդգրկվել է Իսրայելի խորհրդարանի` Քնեսեթի օրակարգ:

Ընդդիմադիր «Maretz» կուսակցության նախագահ Հաիմ Օրոնը նշել է խորհրդարանում նշել է. «Մենք, որպես ցեղասպանության ենթարկված ժողովուրդ, պարտավոր ենք անկեղծ ու կարեկից լինեն մյուսների ցավի նկատմամբ: Արդարությունը պետք է վերականգնվի»:Տեղեկացնում է Զաման պարբերականը:

Շուրջ 25 րոպե տևած քննարկումների ժամանակ հնչել են կողմ և դեմ կարծիքներ: Օրինակ` «Մեր տուն Իսրայել» կուսակցությունից Ռոբերտ Իտալովն իր ելույթում նշել է, որ Քնեսեթը Հայոց ցեղասպանության հարցի քննարկման համար նախատեսված վայր չէ: Իսկ «Լիքուդ» կուսակցությունը ներկայացնող Գիլադ Էրդանը հույս հայտնելով, որ հայ-թուրքական երկխոսությունը կշարունակվի, ցանկացել է, որ Ցեղասպանության հարցն ուղարկվի Քնեսեթի Արտաքին հարաբերությունների և պաշտպանության հանձնաժողով:

Թուրքական պարբերականը տեղեկացնում է նաև, որ չնայած իսրայելաթուրքական հարաբերությունների լարմանը, երկու երկրների արտգործնախարարությունների միջև շարունակվում է նախապես ծրագրված արտաքին քաղաքական խորհրդակցությունների անցկացումը: Թուրքիայի փոխարտգործնախարար Ֆերիդուն Սինիրլիօղլուն մայիսի 2-ին կազմակերպվելիք քաղաքական խորհրդակցությունների շրջանակներում հանդիպելու է Իսրայելի իր պաշտոնակցի` Յոսսի Գալի հետ: Տեղեկացվում է, որ առաջիկայում Իսրայել է մեկնելու նաև Թուրքիայի զինված ուժերի Գլխավոր շտաբի պետ Ասլան Գյուները: