Ձեր վստահելի աղբյուրը

ՀՀ նախագահ Սերժ Սարգսյանը Չինաստան կատարած այցի երրորդ օրը` մայիսի 2-ին, հանդիպում ունեցավ Չինաստանի Ժողովրդավարական Հանրապետության ղեկավար Հու Ձինթաոյի հետ:

«Էքսպո-2010»-ի բացման նպատակով Շանհայում գտնվող ՀՀ նախագահ Սերժ Սարգսյանին Հու Ձինթաոն ընդունեց այդ քաղաքում գտնվող Ձիջիաո պետական ընդունելությունների տանը:

«Երկար տարիներ Դուք մեծ աշխատանք եք կատարել հայ-չինական բարեկամությունը խորացնելու գործում»,- ողջունելով Սերժ Սարգսյանին` ասաց Հու Ձինթաոն:

Հիշեցնելով, որ նախագահ Սերժ Սարգսյանի հետ հանդիպումներ է ունեցել Պեկինի օլիմպիադայի ժամանակ Չինաստանի մայրաքաղաք կատարած այցի և ընդամենը վերջերս Վաշինգտոնում կայացած «Գլոբալ միջուկային անվտանգություն» գագաթաժողովի շրջանակներում, ՉԺՀ ղեկավարը հույս հայտնեց, որ դրանց ընթացքում ձեռք բերված պայմանավորվածությունները կնպաստեն հայ-չինական համագործակցության խորացմանը:

Փաստը, որ ՀՀ նախագահ Սերժ Սարգսյանը կրկին այցելել է Չինաստան` այս անգամ «Շանհայ-էքսպո-2010»-ի բացմանը մասնակցելու նպատակով, ըստ Հու Ձինթաոյի` վկայում է հայ-չինական բարեկամության նկատմամբ նախագահ Սարգսյանի մեծ ուշադրության մասին, ինչի համար ՉԺՀ ղեկավարը շնորհակալություն հայտնեց: Միաժամանակ Հու Ձինթաոն երախտագիտություն հայտնեց Չինաստանում տեղի ունեցած երկրաշարժի առթիվ ՀՀ նախագահի հայտնած ցավակցության և աջակցություն ցուցաբերելու պատրաստակամության համար:

Իր հերթին, նախագահ Սարգսյանը շնորհակալություն հայտնեց Չինաստան այցելելու հրավերի համար: Հանրապետության ղեկավարը նշեց, որ յուրաքանչյուր այցելությունից հետո Չինաստանում նոր ձեռքբերումներ է նկատում: «Հաճույքով արձանագրում եմ այն մեծ հաջողությունները, որ Չինաստանը ձեռք է բերում Ձեր ղեկավարությամբ»,- նշեց Սերժ Սարգսյանը:

Հանրապետության ղեկավարը նշեց, որ Չինաստանի հետ հարաբերությունների զարգացումը ՀՀ արտաքին քաղաքականության առաջնահերթություններից է և նշեց, որ երկկողմ կապերն արդեն իսկ ընդլայնման լավ դինամիկա ունեն:

Հանդիպումն այնուհետ անցավ դռնփակ ռեժիմով, որի ընթացքում նախագահները քննարկել են երկկողմ հետաքրքրություն ներկայացնող հարցերի լայն շրջանակ: Մասնավորապես կողմերը գոհունակությամբ արձանագրել են, որ էներգետիկայի, քիմիական արդյունաբերության, գյուղատնտեսության, գիտության և տեխնիկայի, պաշտպանության, մշակույթի և կրթության բնագավառներրում բազմաթիվ համատեղ նախագծեր իրականացվել են մեծ հաջողությամբ: Սերժ Սարգսյանն ու Հու Ձինթաոն հայ-չինական համագործակցության` մինչ այժմ կուտակած մեծ փորձը լավ հիմք են համարել` որակական նոր աստիճանի բարձրացնելու երկկողմ հարաբերությունները:
Նախագահները նաև քննարկել են Հայաստան-Իրան երկաթուղու կառուցմանը` Չինաստանի մասնակցության հարցերը: Կողմերն ընդգծել են, որ ՉԺՀ Շանսի նահանգում հայ-չինական «Շանսի-Նաիրիտ» համատեղ ձեռնարկության գործարկումը երկկողմ կապերի զարգացման կարևոր վկայություն է:

Ի դեպ, այցելության վերջին օրը` մայիսի 3-ին, նախագահ Սարգսյանը կմասնակցի «Շանսի-Նաիրիտ» ձեռնարկության գործարկմանը:

Մինչև ՉԺՀ նախագահի հետ հանդիպումը, ինչպես նաև դրանից հետո, Սերժ Սարգսյանը մայիսի 2-ին հանդիպումներ ունեցավ նաև տեղեկատվական տեխնոլոգիաների ոլորտում գործող չինական առաջատար ընկերությունների ներկայացուցիչների հետ:

Նախագահ Սարգսյանը նախ իր կեցավայրում ընդունեց «Հուավեյ» (Huawei Technologies Co. Ltd.) կորպորացիայի գործադիր տնօրեն Լին Րուի Չիին: Իսկ օրվա երկրորդ կեսին հայկական պատվիրակությունը` նախագահի գլխավորությամբ, այցելեց «ZTE» (Zhong Xing Telecommunication Equipment Company Limited) կորպորացիայի շտաբ-բնակարան, որտեղ նրանց ընդունեց կորպորացիայի նախագահ Լիրոն Շին:

Հիշյալ երկու ընկերությունները, որ մասնագիտացած են հեռահաղորդակցության ոլորտի մի շարք ճյուղերում` սարքավորումների արտադրություն, էլեկտրոնային կառավարում, հեռաղարդակցական համակարգեր և այլն, մտադիր են ներգրավվել Հայաստանում հեռուստահաղորդակցության ոլորտում իրականացվելիք հավակնոտ ծրագրերին:

Նախագահ Սարգսյանը ZTE ընկերության ղեկավարին ներկայացրեց Հայաստանում նախաձեռնված ծրագրերը և համագործակցության պատրաստակամություն հայտնեց: Դրական վերաբերելով չինական ընկերության` Հայաստանում գործունեություն ծավալելու հետաքրքրությանը, նախագահ Սարգսյանը միաժամանակ նշեց, որ հայկական կողմը պատրաստ է աջակցելու չինական ընկերություններին և ցանկություն ունի մասնակցել նաև արտադրական պրոցեսին:

ZTE և «Հուավեյ» ընկերությունները մրցակիցներ են, ըստ որում` առաջինը պետական, իսկ երկրորդը` մասնավոր սեփականություն է: Չնայած այդ հանգամանքին` «Հուավեյ»-ն իրացման ծավալներով` մոտ 30 մլրդ դոլար տարեկան, 2,5 անգամ գերազանցում է ZTE-ին:

Դինամիկ զարգացող այս ընկերությունը, որ ներկայումս հեղինակային արտոնագրերի քանակով աշխարհում զիջում է միայն «Ինտել»-ին, իսկ իրացման ծավալներով` «Էրիքսոնին», մտադիր է հեռահաղորդակցական տեխնոլոգիաների համաշխարհային շուկայում առաջիկա 3 տարիներին դուրս գալ առաջին տեղը: Այդ նպատակի իրագործման համար չինական ընկերությունը հետաքրքրված է գործունեություն ծավալել նաև Հայաստանում: «Հուավեյ»-ի ղեկավարը նախագահ Սարգսյանի հետ հանդիպման ընթացքում քննարկել է դրանց հեռանկարները:

Չինական կորպորացիաների հետ քննարկումների արդյունքում` հայկական կողմը համագործակցության մտադրությունների մասին հուշագիր ստորագրեց «Հուավեյ» ընկերության հետ:

Նախագահ Սարգսյանի մասնակցությամբ` տեղի ունեցած քննարկումներն ու չինական ընկերության հետ կնքված հուշագիրը մեկնաբանեց ՀՀ էկոնոմիկայի նախարար Ներսես Երիցյանը: «Երեք ծրագրերը, որ մենք ներկայացրել ենք, հավակնոտ, լուրջ ծրագրեր են: Ընկերությունը Հայաստանում արդեն կա, տեղեկություններն ունի, և հետաքրքրությունը պատահական չի առաջացել, այլ հասունացել է ժամանակի ընթացքում: Չինական ընկերություններն այսօր ունեն լուրջ միջոցներ և ագրեսիվ տեղաշարժվում են դեպի Արևմուտք,- ասաց նա ու հավելեց,- իսկ ինչու՞ չօգտվել առիթից ու նրանց կանգնեցնել Հայաստանում»: