Ձեր վստահելի աղբյուրը

«Ինտերլինգվա» ոչ պետական լեզվագիտական համալսարանի ռեկտոր Իվետա Առաքելյանն այսօրվա ասուլիսում խոսելով բարձրագույն կրթական համակարգում իրականացվող բարեփոխումների մասին, նշեց, որ շատ դրական է գնահատում իրականացվող բարեփոխումներն, որոնք միտված են բարձրացնելու ուսման որակը: «Մասնավոր բուհի զարգացման հարցը, դա պետության հարցն է, իսկ պետությունն էլ այսօր փորձեր է կատարում կատարելագործել և զարգացնել մասնավոր բուհերը»,- ասաց նա:

Ասուլիսին ներկա Երևանի պետական մանկավարժական համալսարանի ռեկտոր Արտուշ Ղուկասյանը նշեց, որ բարձրագույն կրթական համակարգում բարեփոխումները սկսվել են իրականացվել դեռևս 2002 թվականից և մինչև այժմ էլ շարունակվում են, որոնք իրապես անհրաժեշտություն են մեր կրթական համակարգի համար:

«Բուհերում իրականացվող բարեփոխումների ամենամեծ ձեռքբերումն եռաստիճան կրթական համակարգի ներդրումն էր»,- ասաց նա:

Անդրադառնալով ՀՀ կառավարության այն որոշմանը, ըստ որի 2011 թվականին պետական և ոչ պետական բուհերի ընդունելության քննությունները պետք է անցկացվեն միասին, Արտուշ Ղուկասյանը նշեց, որ այդ դեպքում կառաջանա մրցակցություն, որի արդյունքում կտուժեն ոչ պետական բուհերը:

Նա նշեց, որ նմանատիպ փորձ արվել է երեք տարի առաջ, սակայն այն ժամանակ ոչ պետական բուհերը միայն ցանկության դեպքում կարող էին մասնակցել, այն ստիպողաբար չէր:

«Եվ նման քայլին համարձակություն ունեցավ մասնակցելու «Գլաձոր» ոչ պետական համալսարանը, սակայն արդյունքում համալսարանը նման ընդունելության կարգով ընդունված ընդամենը երկու ուսանող ունեցավ»,- հավելեց նա:

Նրա խոսքով, ինչ վերաբերում է պետական բուհերին, ապա նման ընդունելության կարգը պետական բուհերի համար ոչ մի խնդիր չի առաջացնի, քանի որ այդ դեպքում դիմորդների 90 տոկոսը կդիմի պետական բուհ:

Իվետա Առաքելյանը նշեց, որ դեռ մեր հասարակությունը պատրաստ չէ նրան, որ և մասնավոր և պետական բուհ ընդունվելու համար հանձնեն նույն ընթացակարգային քննությունները:

«Ես էլ այն մտավախություննը ունեմ, որ եթե պետական և ոչ պետական բուհերի ընդունելության քննությունները անցկացվեն նույն ընթացակագրով, ապա կտուժեն ոչ պետական բուհերը, քանի որ դիմորդների զգալի մասը կդիմի պեատական բուհեր, իսկ ոչ պետական բուհերը կունենան քիչ դիմորդներ»,- ասաց նա:

Արտուշ Ղուկասյանը հայտնեց, որ Արցախում արդեն մի քանի տարի է, ինչ պետական և ոչ պետական բուհերի ընդունելության քննությունները անցկացվում են միասին: Ըստ նրա, չնայած նրան, որ նման դեպքում ոչ պետական բուհերը հնարավոր է տուժեն, սակայն այն անհրաժեշտություն է, որպեսզի հասկանալի լինի, թե որ բուհը իրապես այսօր պահանջարկ ունի:

«Վերջի վերջո չի կարել է, որ ոչ պետական բուհերն ինչպես ցանկանան, այնպես էլ ընդունելության քննություններ անցկացնեն, սակայն ունենան պետական հավաստագրի նմուշ»,- ասաց նա:

Երևանի պետական մանկավարժական համալսարանի ռեկտորի խոսքով, նման փորձությունից չպետք է վախենալ, իրապես կլինեն խնդիրներ, սակայն դրանք բոլորը կշտկվեն ժամանակի ընթացքում:

Իվետա Առաքելյանն նշեց, որ չնայած մտավախություններ ունի, սակայն նման քայլը շատ ճիշտ է համարում, քանի որ եթե պետությունը ոչ պետական բուհին տալիս է պետական նմուշի հավաստագիր, ապա իրավունք ունի պահանջելու, որ ոչ պետական բուհերի ընդունելության ընթացակարգը պետական բուհերի ընդունելության ընթացակարգի նման լինի: