Ձեր վստահելի աղբյուրը

Մարդու իրավունքների պաշտպան Արմեն Հարությունյանը Հայաստանում խոսքի, տեղեկատվության ազատությունը «երկուս» է գնահատում: Այս մասին լրագրողների հետ զրույցում ասաց պաշտպանը` մամուլի ազատության օրվան նվիրված «Մամուլի ազատություն, տեղեկատվության ազատության իրավունք» թեմայով լուսանկարների ցուցահանդեսի ժամանակ:

Ըստ նրա, խոսքի, տեղեկատվության ազատությունը նույնքան կարևոր է, որքան արդար դատաքննության իրավունքը, քանի որ դրանք, ըստ պաշտպանի, անկյունաքարային իրավուքններից ու ազատության իրավուքներից են:

«Եթե այդ իրավուքնենրն ապահովված չեն, ապա կարծես թե դրանից հետո միջավայր չի ստեղծվում, որ կարողանանք ապահովել մյուս իրավունքները, իսկ դրա հիման վրա արդեն դժվար է քաղաքացիական հասարակություն ձևավորել»,-ասաց Ա. Հարությունյանը:

Պաշտպանը կարծում է, որ խոսքի, տեղեկատվության իրավունքն այն իրավունքն է, որտեղ «կոմպրոմիսի», վիճարկման կարիք չպետք է լինի. կամ ազատ է, կամ` ոչ: Համեմատելով տարածաշաշրջանի երկրներում տեղեկատվության, խոսքի ազատության իրավունքի պաշտպանությունը` Հայաստանում տվյալ իրավունքի կիրառման հետ` նա նշեց, որ Ադրբեջանի հետ համեմատությունն անիմաստ է, քանի որ այն տոտալիտար պետություն է, իսկ Վրաստանում նույն իրավիճակն է` ինչ Հայաստանում:

Ցուցահանդեսին ներկա էր ու լրագրողների հարցերին նաև պատասխանեց հանրապետության գլխավոր դատախազ Աղվան Հովսեփյանը: Գլխավոր դատախազը նշեց, որ վերջին տարիներին դատախազական կամակարգը հատկապես ուշադրություն է դարձնում խոսքի ազատությանն ու առավելագույնս նպաստում է խոսքի ազատությանն ու տեղեկատվություն ստանալու իրավունքի իրականացմանը:

«Չկա մի հանգամանք, գործ, որը մենք կցանկանայինք գաղտնի պահել մեր հասարակությունից: Հակառակը` շատ դեպքերում մենք ենք նախաձեռնող տարբեր տեղեկատություն տարածելու հարցում»,-ասաց Ա. Հովսեփյանը:

Գլխավոր դատախազը վերջում նշեց, որ տեղեկատվության ազատությունն ուղղակի անհրաժեշտություն է, քանի որ քաղաքացիական հասարակարգի կառուցման ու ձևավորման առաջին պայմաններից մեկն է, որ հասարակությունը հսկողություն իրականացնի: Իսկ հսկողություն անցկացնելու համար, նրա խոսքվ, հարկավոր է տեղեկացված լինել: Ա. Հովսեփյանը նկատեց, որ ազատ խոսքը լավ բան է, սակայն հարկավոր է սուտը ճշմարիտից տարբերակել կարողանալ: